ئاری موختار و محەممەد شێخ حەیدەر بەفەرمی بە شەهیدی ژینگە ناسێنران

ئاڤا نیوز

وەزیری ناوخۆ ڕەزامەندی دا لەسەر بەفەرمی ناساندنی ئاری موختار و محەممەد شێخ حەیدەر، وەك شەهیدانی ژینگە و، بڕینەوەی مووچەیەكی شایستە بۆ بنەماڵەی سەربەرزییان، هاوكات پێشنیازکرا ناوی "بنکەی پۆلیسی دارستان و ژینگەی خورماڵ" بگۆڕدرێت بۆ "بنکەی پۆلیسی شەهیدی ژینگە محەمەد شێخ حەیدەر".

وێنە گەورەكە: هەردوو ژینگەدۆست ئاری موختار و محەممەد شێخ حەیدەر، لە هەوڵی كووژاندنەوەی ئاگرە گەورەكەی ئەمدواییەی سنووری پارێزگای هەڵەبجە گیانیان سپارد، كە جگە لە زیانی گیانی، سەرووی پێنج هەزار دۆنم زەوی سووتان و زیانی زۆری بە باخدار و ئاژەڵدارانی شەش گوندی ناوچەكە گەیاند.

چیرۆكی سەرەكی: بە مەبەستی گەیاندنی ژمارەیەك داواكاریی پارێزگای هەڵەبجە بە وەزارەتی ناوخۆ، ئەمڕۆ چوارشەممە 3ـی ئەیلوولی 2025، ڕێبەر ئەحمەد، وەزیری ناوخۆ، پێشوازی لە نوخشە ناسیح، پارێزگاری هەڵەبجە كرد.

لێدوانی فەرمی: نوخشە ناسیح، پارێزگاری هەڵەبجە ڕایگەیاند، بەخۆشحاڵییەوە وەزیری ناوخۆی هەرێمی كوردستان، ڕەزامەندی دا لەسەر داواكاریی بەفەرمی ناساندنی هەریەك لە ئاری موختار و محەممەد شێخ حەیدەر، وەك شەهیدانی ژینگە، هاوكات بۆ بەرزڕاگرتنی یادی شەهید محەمەد شێخ حەیدەر، پێشنیازکرا ناوی "بنکەی پۆلیسی دارستان و ژینگەی خورماڵ" بگۆڕدرێت بۆ "بنکەی پۆلیسی شەهیدی ژینگە محەمەد شێخ حەیدەر".

لەلایەكی دیكەوە: پارێزگاری هەڵەبجە، سوپاس و پێزانینی زۆری ئاڕاستەی سەرۆكی حکومەتی هەرێمی کوردستان و جێگری سەرۆکی حکومەت و وەزیری ناوخۆ کرد، بەرامبەر بەو پەیوەندییە بەردەوام و پشتیوانییەی کە لەماوەی چەند ڕۆژی ڕووداوی ئاگرەکەدا پێشکەشیان کرد و هاوکار و پاڵپشت بوون.