ڕۆژئاوای کوردستان پڕۆگرامەکانی خوێندنی حكومەتی سووریا لە قوتابخانەکانیدا ڕادەگرێت

ئاڤا نیوز

 

ئیدارەی خۆسەری ڕۆژئاوای کوردستان سەرجەم قوتابخانە حکومیی و ناحکومییەکانی "ئاگادارکردەوە" کە پڕۆگرامەکانی خوێندنی حکومەتی ڕاگوزەری سووریا لە ناوچەکانیدا هەڵوەشێنراوەتەوە و چیتر کاری پێناکرێت.

 

وێنە گەورەکە: لە چەند مانگی ڕابردوودا لێکتێگەیشتن لەنێوان ئیدارەی خۆسەریی و دیمەشق لەبارەی پرۆگرامەکانی خوێندن و تاقیکردنەوەکان دروستبوو و لە باکوور و ڕۆژهەڵاتی سووریا تاقیکردنەوەی قوتابیان بە پڕۆگرامەکانی خوێندنی دیمەشق کران، بەڵام تائێستا کێشەی داننان بە بڕوانامەی دامەزراوەکانی ئیدارەی خۆسەر لەلایەن دیمەشقەوە بەردەوامە.

 

زانیاریی بەدەستهاتوو: ئاژانسی نۆرس پرێس بڵاویکردەوە، لە کۆبوونەوەی ڕۆژی چوارشەممەی نێوان مامۆستایان و ئیدارەی خۆسەری باکوور و ڕۆژهەڵاتی سووریادا، مامۆستایان ئاگادار کراونەتەوە کە چیتر پرۆگرامەکانی خوێندنی حکومەتی سووریا لە ناوچەکانی باکوور و ڕۆژهەڵاتی سووریا ناخوێندرێن، بڕیارە لە ڕۆژانی داهاتووشدا ئەم ئاگادارکردنەوەیە بکرێت بە بڕیارێکی فەرمیی و بڵاوبکرێتەوە.

 

ئەوەی پێویستە بیزانیت: تائێستا هۆکاری ئەو بڕیارەی ئیدارەی ڕۆژئاوای کوردستان ڕوون نییە، بەڵام ڕێککەوتنی 10ی ئازاری نێوان ئیدارەی خۆسەر و دیمەشق بۆ تێکەڵکردنەوەی دامەزراوەکان بە خاوی دەچێتە پێشەوە و سەرەڕای نێوەندگیری واشنتن و پاریسیش، بەڵام تائێستا دانووستانەکان بێ ئەنجام بوون.