قاسم ئەعرەجی: لایەنی پشت هێرشە درۆنییەکانی سەر کوردستانمان دیاریی کردووە

ئاڤا نیوز

 

ڕاوێژکاری ئاسایشی نیشتمانیی عێراق دەڵێت، ئەو لایانانەیان دیاریی کردووە کە لە چەند مانگی ڕابردوودا بە درۆن هێرشیانکردە سەر ناوچە جیاوازەکانی هەرێمی کوردستان، دڵنیاییش دەدات لەوەی سنوورێک بۆ هێرشەکان دانراوە و دووبارە نابنەوە.

 

وێنە گەورەکە: لە چەند مانگی ڕابردوو چەندین جار بە درۆن هێرشکرایە سەر ناوچەکانی کوردستان و زیاتریش ژێرخانی وزە و کێڵگە نەوتییەکان بە ئامانج دەگیران، بەوهۆیەش پرۆسەی بەرهەمهێنانی نەوت لە کێڵگەکان زیانی بەرکەوت و بەشێکیان لە بەرهەمهێنان وەستان، تائێستاش کاریگەرییەکانی ئەو هێرشانە ماون.

 

لێدوانی فەرمی: قاسم ئەعرەجی، ڕاوێژکاری ئاسایشی نیشتمانیی عێراق لە چاوپێککەوتنێکدا لەگەڵ کەناڵی شەرقییە باسی لەوەکرد، "سەرۆکوەزیران لیژنەیەکی بەسەرۆکایەتیی ئێمە پێکهێنا و ئێمەش سەردانی شوێنە بە ئامانج گیراوەکانمان کرد و بەڵگەکانمان کۆکردەوە، ڕاپۆرتی کۆتایی خۆشمان بە واژۆی سەرجەم ئەندامانی لیژنە تەواو کرد، لە ڕاپۆرتەکەدا هەموو لایەنە (هێرشکارەکان)ـمان بە وردی دیاری کردووە".

 

وتیشی، "ئامانجی ئێمە سەرەتا ئارامییە دواتر چارەسەر، سنوورێکیش بۆ ‌هێرشەکان دانراوە و ئێمە حکومەتین دەزانین کە چۆن بە دانایی، عەقڵانیی، گفتوگۆ و دیپلۆماسییەت مامەڵە بکەین، ئەوەش کارنامەی حکومەتە، پشت بەخوا لەمەودواش هیچ هێرشێک ڕوونادات، ئەوەی هاووڵاتیان لە ئارامیی و ئاسایش لەئێمەیان دەوێت بۆیان دابین دەکەین".