پاپا لیۆ و سەرۆکی ئیسرائیل کۆدەبنەوە؛ پرسی غەززە تاوتوێ دەکەن

ئاڤا نیوز

بڕیارە ئەمڕۆ پاپا لیۆی چواردەم، پاپای ڤاتیکان و ئیسحاق هێرزۆگ، سەرۆکی ئیسرائیل پێنجشەممە لە ڤاتیکان کۆببنەوە، بەڵام ناکۆکی لەسەر ئەوە دروست بووە کە کێ دەستپێشخەری بۆ ئەم کۆبوونەوەیە کردووە.

زانیاریی بەدەستهاتوو: سەرۆکایەتیی ئیسرائیل ڕایگەیاند، هێرزۆگ ڕۆژی پێنجشەممە لەسەر بانگهێشتی پاپا لەگەڵ لیۆ کۆدەبێتەوە، لە بەرامبەردا ڤاتیکان لە ڕاگەیێنراوێکدا ڕایگەیاند، نەریتییە وەڵامی داواکارییەکان بدرێتەوە کە لەلایەن سەرۆکی دەوڵەتان و حکومەتەکانەوە پێشکەس دەکرێت بۆ بینینی پاپا، ئاماژە بەوەش دەکات، لای ئێمە نەریت نییە بانگهێشتنامەیان پێشکەش بکرێت.

زانیاریی زیاتر: نووسینگەی هێرزۆگ لە ڕاگەیێنراوێکدا ڕایگەیاندووە، هەردوولا تاوتوێی هەوڵەکانی گەڕانەوەی بارمتەکان دەکەن کە لە کەرتی غەززە دەستبەسەرکراون، و پاراستنی پێکهاتە مەسیحییەکان لە ڕۆژهەڵاتی ناوەڕاست.

ئەمەش بزانە: پاپا لیۆ هەفتەی ڕابردوو بانگەوازی بۆ کۆتاییهێنان بە شەڕی دوو ساڵەی کەرتی غەززە کرد و داوای کرد سەرجەم بارمتە دەستبەسەرکراوەکان ئازاد بکرێن و ڕێگە بە چوونە ژوورەوەی هاوکاریی بۆ ناو کەرتەکە بدرێت.