ئاڤا بەدواداچوون بۆ فرۆشتنی گۆشتی خراپبوو لە بازاڕی بەلەدییەکەی سلێمانی دەکات

ئاڤا نیوز

ئاڤا میدیا بەدواداچوون بۆ فرۆشتنی گۆشتی خراپبوو لە بازاڕی بەلەدییەکەی شاری سلێمانی دەکات، سەرۆکی لیژنە هاوبەشەکانی سلێمانی دەڵێت: لیژنەکانیان بە بەردەوامی چاودێریی بازاڕەکە دەکەن.

چیرۆکی سەرەکی: چەند هاونیشتمانییەک پەیوەندییان بە ئاڤا میدیاوە کردووە و دەڵێن: لە بازاڕی بەلەدییەکەی شاری سلێمانی گۆشتی "قیمە"مان کڕیوە، دواتر کاریگەریی لەسەر تەندروستییمان هەبوو؛ بۆمان دەرکەوت گۆشتەکە خراپبووە.

لێدوانی فەرمی: گۆران قادر، سەرۆکی لیژنە هاوبەشەکانی قائیمقامییەتی سلێمانی بە ئاڤای ڕاگەیاند: ڕۆژانە خەڵکێکی زۆر سەردانی بازارەکە دەکەن و ناتوانین بە یەک دوو حاڵەت بڕیار بدەین، لیژنەکانمان بە بەردەوامی چاودێریی بازاڕەکە دەکەن و دوکاندارەکان گۆشتی مۆرکراو و ڕێگەپێدراو دەفرۆشن، تاوەکو بتوانین بڕیاری لەسەر تێکچوونی هەر شتێک بدەین، پێویستە لەبەر دەستمان بێت.

زانیاریی زیاتر: بە گوتەی سەرۆکی لیژنە هاوبەشەکانی قائیمقامییەتی سلێمانی، هەر کەسێک گۆشتی تێکچووی لە بازاڕەکە کڕیوە، با پەیوەندی بە لیژنەکانەوە بکات و بەدواداچوونی بۆ دەکەین، لیژنەکان بۆیان هەیە بەدواداچوونی ورد لەسەر هەر بابەت و حاڵەتێک بکەن، تەنانەت دەتوانین لەڕیگەی کامێراکانی چاودێرییەوە ڕێکاری پێویست بگرینەبەر و ڕاستییەکان ئاشکرا بکەین.