ئاسایشی سلێمانی هەواڵێكی ئاڤا میدیا لەبارەی دەستگیرکردنی ئەمریکییەک لە لالەزار پشتڕاست دەکاتەوە

ئاڤا نیوز

لە چەند ڕۆژی ڕابردوودا ئاڤا میدیا وەك یەكەم میدیای كوردی بڵاوی كردەوە كە لە هێرشی هێزەکانی یەکێتی بۆ سەر لالەزار هاووڵاتییەکی ئەمریکی بێسەروشوێن بووە، ئەمڕۆ گوتەبێژی دەزگای ئاسایشی هەرێمی كوردستان هەواڵەكەی ئاڤا میدیای پشتڕاست كردەوە.

چیرۆكی سەرەكی: ڕۆژی 30-8-2025، ئاڤا میدیا لە سكووپێكدا ئاشكرای كرد كە لە هێرشی هێزەکانی یەکێتی بۆ سەر لالەزار، هاووڵاتییەکی ئەمریکی بەناوی برایان ویڵسن کە ڕاهێنانی بە هێزەکانی دووپشک کردووە، دیار نەماوە.

زانیاریی بەدەستهاتوو: ئەمڕۆ عەقید سەلام عەبدولخالق، گوتەبێژی دەزگای ئاسایشی هەرێمی كوردستان  لە لێدوانێكیدا هەواڵەكەی ئاڤا میدیای پشتڕاست كردەوە و زانیاریشی سەبارەت بە چارەنووسی ئەو هاووڵاتییە ئەمریكییە خستە ڕوو.

زانیاریی زیاتر: گوتەبێژی دەزگای ئاسایشی هەرێمی كوردستان ڕایگەیاندووە كە هاووڵاتییەکی ئەمریکی بە ناوی برایان ویڵسن لە شەوی روداوەکەی لالەزاردا لە 22-08-2025 دەستگیرکراوە و پاش لێکۆڵینەوە لەگەڵی دانی بەوەدا ناوە، کە خۆی سەربەخۆ و بەبێ ئاگاداری و رەزامەندیی وڵاتەکەی کە ئەمریکایە هاوکار بووە لە دروستکردن و مەشق و راهێنانی مەیدانی بە هێزی دووپشك و ئێستا دەستبەسەرە.

ئەوەی پێویستە بیزانیت: برایان ویڵسن، خەڵکی ویلایەتی ئۆھایۆی ئەمریکایە و  سەربازێکی خانەنشین بووە لە هێزی ئاسمانی ئەمریکا و لە ئۆپراسیۆنەکانی ئەمریکا لە میانی گەردەلوولی بیابان دژی هێزەکانی ڕژێمی پێشووی عێراق شەڕی کردووە.

ئەمەش بزانە: لە ساڵی 2014ەوە چووەتە ڕۆژئاوای کوردستان و لەگەڵ هێزەکانی یەپەژە ڕووبەڕووی ڕێکخراوی داعش شەڕی کردووە.