وەزارەتی دارایی عێراق مووچەی خانەنشینان بۆ مانگی ئەیلوول خەرج دەکات

ئاڤا نیوز

دوای ئەوەی بۆ ماوەی چەند ڕۆژێک لەوادەی خۆی دواکەوت، ئەمڕۆ هەینی (5ی ئەیلوولی 2025) وەزارەتی دارایی عێراق، دابەشکردنی مووچەی خانەنشینانی بۆ مانگی ئەیلوولی ئەمساڵ ڕاگەیاند.

وێنە گەورەکە: وەزارەتی دارایی عێراق سەرەتای هەموو مانگێک لەڕێگەی ماستەر کاردی بانکە حکومییەکانەوە مووچەی خانەنشینان دابەش دەکات، بەڵام ئەم مانگە چەند ڕۆژێک لەوادەی خۆی دواکەوتووە، دوینێش پێنجشەممە، سەرۆکوەزیرانی عێراق فەرمانی بە کارمەندانی وەزارەتی دارایی و بانکە حکومییەکان دا، بۆ دابەشکردنی مووچەی خانەنشینان ڕۆژانی هەینی و شەممە دەوامی فەرمی بکەن.

ڕاگەیێنراوی فەرمی: وەزارەتی دارایی عێراق ڕایگەیاند: دەستەی نیشتمانی خانەنشینی و هەردوو بانکی ڕافیدەین و ڕەشید دەستیان بە خەرجکردنی مووچەی خانەنشینانی شارستانی و سەربازی بۆ مانگی ئەیلوولی ئەمساڵ لە ڕێگەی کارتی پارەدانی ئەلیکترۆنیی ماستەر کارد کردووە.

 
زانیاریی زیاتر: وەزارەتی دارایی عێراق داوای لە سەرجەم خانەنشینان کرد، دوای ئەوەی پەیامی کورتەنامەیان سەبارەت بەمووچەکانیان  پێدەگات، سەردانی لقەکانی بانکەکان یان ناوەندەکانی خەرجکردنی پارە لە بەغدا و پارێزگاکان بۆ وەرگرتنی شایستە داراییەکانیان بکەن.

ئەمەش بزانە: هەر دوێنی پێنجشەممە 4-9-2025، وەزارەتی دارایی عێراق بەیاننامەیەکی بڵاوکردەوە و هۆکاری دواکەوتنی مووچەی خانەنشینانی خستەڕوو و ئاشکراشیکرد کە ئەو بابەتە هونەرییە و پەیوەندی بە پارەی نەختینەوە نییە.