ڕەحمان غەریب: میترۆ سەروپێخانە نییە تا حیزبێك لافیتەیەك بە دەرگاكەی هەڵبواسن و بنووسن "دامانخست"

ئاڤا نیوز

ڕێکخەری سەنتەری میترۆ بۆ داکۆکی لە مافی ڕۆژنامەنووسان، دەنگۆی داخستنی سەنتەری میترۆ ڕەت دەكاتەوە و ئاماژە بەوە دەكات، میترۆ بە پارەی سیاسی بەڕێوەناچێت تا دەستوەردان لە كارەكانیدا بكرێت.

وێنە گەورەكە: دوای ڕووداوەكانی شەوی 22ـی ئابی شاری سلێمانی و هێرشكردنە سەر لالەزار و داخستنی میدیای نزیك لە لاهوور شێخ جەنگی و دەستگیركردنی ڕۆژنامەنووس و بردنی كەلوپەلە ڕۆژنامەوانییەكانی دەزگاكە، سەنتەری میترۆ بۆ داكۆكی لە مافی ڕۆژنامەنووسان، نیگەرانی قووڵی دەربڕی و پێشێلكاری بۆ سەر ڕۆژنامەنووسان و دەزگای میدیایی بە هەر بیانووێك، بە تووندی ڕەتكردەوە.

لێدوانی فەرمی: ڕەحمان غەریب، ڕێکخەری سەنتەری میترۆ بۆ داکۆکی لە مافی ڕۆژنامەنووسان، لە ئەژماری فەرمیی خۆی ڕایگەیاند، سەرباری هەوڵەكانی دەسەڵاتی سیاسی بۆ بێدەنگكردنی دەنگی ئازاد و وەگەڕخستنی شەڕی دەروونی بۆ بڵاوكردنەوەی نائومێدی، نابێت بە هەر پاساوێك بێت لەئاست پێشێلكردنی مافەكانی مرۆڤ لە هەرێمی كوردستان، بێدەنگ بین.

ڕێكخەری سەنتەری میترۆ دووپاتی دەكاتەوە، توڕە و ناڕازییە لەوەی ڕووی لوولەی تۆپخانە و زرێپۆش بكرێتە ڕۆڵەی كورد و ڕۆژنامەنووس و ڕەخنەگر و سەركردەی ئۆپۆزسیۆن و چالاكوانی مەدەنی بخرێنە كونجی زیندان.

زانیاریی زیاتر: سەنتەری میترۆ بۆ داكۆكیردن لە ڕۆژنامەنووسان لەلایەن ڕێكخراوی جیهانیی IMS ـی دانیماڕكی پاڵپشتی دارایی دەكرێت و دەیان هاوبەشی نێودەوڵەتی هەیە، بە پارەی سیاسی بەڕێوە ناچێت تا دەستێوەردان لە كارەكانیدا بكرێت و بە هەوەسی حیزبێك دابخرێت، ئەوە بە وتەی ڕێكخەری سەنتەرەكە.