عێراق سەبارەت بە بەشداریکردنی هاووڵاتیانی لە جەنگی ڕووسیا و ئۆکراینا هاتە دەنگ

ئاڤا نیوز

باڵیۆزخانەی عێراق لە ڕووسیا دەڵێت؛ هاووڵاتییانی عێراقی نەچوونەتە بەرەی هیچکام لە ڕووسیا و ئۆکراینا لە جەنگی نێوانیان و ئەو بانگەشانەی لەمبارەیەوە دەکرێن بە "ناڕاست" ناودەبات.

چیرۆکی سەرەکی: کەسایەتیەک بەناوی حه‌یده‌ر شه‌ممه‌ری خۆی وەکو نوێنەری ڕەوەندی عێراقی لە ڕووسیا ناساندووە بە میدیا عێراقییەکانی ڕاگەیاندووە گوایە هەزاران هاووڵاتیی عێراق لە جەنگی ڕووسیا و ئۆکراینا بەشداریان کردووە، لە بەرامبەردا باڵیۆزخانەی عێراق لە مۆسکو هاتە دەنگ و دووپاتی کردەوە،"بانگه‌شه‌یه‌كی ناڕاسته‌ و هیچ بنه‌مایه‌كی نییه‌".

لێدوانی فەرمی: حه‌یده‌ر شه‌ممه‌ری له‌ دیدارێكیدا له‌گه‌ڵ كه‌ناڵی "ئەلشه‌رقییه"ـی عێراقی‌ ڕایگەیاند‌: "پێنج هه‌زار هاووڵاتیی عیراقی له‌نێو ڕیزه‌كانی هه‌ردوو سوپای ڕووسیا و ئۆكراینا له‌دژی یه‌كتری ده‌جه‌نگن، دوو هه‌زاریان له‌ناو سوپای ڕووسیادان و سێ هه‌زاره‌كه‌ی دیكه‌ش له‌ناو سوپای ئۆكراینادان، وتیشی؛ مافیا هەیە بە پارە عێراقییەکان بەلاڕێدەبەن و دواتر ناچاریان دەکەن شەڕ بکەن."

زانیاریی زیاتر: کەناڵی "ئەلشەرقیە" لەسەر زاری پەیامنێرەکەیان لە مۆسکۆ ئاشکرای کردووە: ڕووسیا ڕەگەزنامە و بڕی پێنج ملیۆن "ڕۆبل"ـی ڕووسی دەداتە عێراقییەکان بۆ چوونە نێو سوپا و شەڕکردن دژی سوپای ئۆکراینا، ئەمەشی ئاشکرا کرد کە  70 بۆ 80%ـی ئەو چەکدارە عێراقییانە لە ڕووسیا دەکوژرێن.

لەلایەکی دیکەوە: باڵیۆزخانه‌ی عێراق ده‌ڵێت: "هیچ ڤیزایه‌ك په‌یوه‌ندی به‌و بانگه‌شه‌ چه‌واشه‌كارانه‌وه‌ هه‌بێت ده‌رناكه‌ین و تاكه‌ لایه‌نی ده‌سه‌ڵاتدار بۆ ده‌ركردنی ڤیزای ڕووسیا، باڵیۆزخانه‌ی ئەو وڵاتەیە له‌ به‌غدا و كونسوڵخانه‌كانیه‌تی له‌ هه‌ولێر و به‌سره‌".

باڵیۆزخانه‌كه‌ جه‌خت له‌سه‌ر هه‌ڵوێستی "نه‌گۆڕی" عێراق ده‌كاته‌وه‌ له‌ بێلایه‌نی له‌ جەنگی ڕووسیا و ئۆكراینا هەروەها هۆشداریی دا لە "هەوڵدان بۆ ڕاکێشان یان بەلاڕێدابردنی ئەو عێراقییانەی لە ڕووسیا یان دەرەوەی وڵاتن بە بیانووی جۆراوجۆر بۆ بەشداریکردن لە شەڕەکەدا".