وتەبێژی بارەگای بارزانی: ئایا هەڵوەشانەوەی سندووقی خانەنشینی بڕینی مووچەی فەرمانبەرانی عێراقی بەدوا نایەت؟

ئاڤا نیوز

وتەبێژی بارەگای بارزانی لە هەژماری خۆی لە تۆڕی ئێکس نووسیویەتی، ئایا سندوقی خانەنشینی بۆ هەڵوەشایەوە؟ پارەکەی بۆ کوێ چوو؟ ئایا بڕینی مووچەی فەرمانبەرانی عێراقی بەدوا نایەت؟

وێنە گەورەکە: حکومەتی عێراق لە ساڵی 2014ـەوە بودجەی هەرێمی کوردستانی بڕیووە، ماوەی 11 ساڵە بە چەندین بیانووی جیاواز مووچەی فەرمانبەران دوادەخرێت، یان هەر ناینێرێت.

بڵاوکراوەی فەرمی: خالیدە خەلیل، وتەبێژی بارەگای بارزانی دەنوسێت، "لە کوردستان، مووچەی فەرمانبەران بەردەوام چەند مانگێک دوادەکەوێت و حکومەتی فیدراڵی لە بەغداش وا مامەڵە دەکات وەک ئەوەی ئەو فەرمانبەرانە نە خێزان و نە پابەندبوون و نە بارگرانی خواستی ڕۆژانەی ژیانیان هەبێت، بەڵکو ڕووبەڕووی بێدەنگی و پشتگوێخستن دەبنەوە. لەبەرامبەریشدا کاتێک مووچەی خانەنشینان لە بەغدا تەنیا چەند ڕۆژێک دواکەوت، مانشێتی گەورە و لێدوانی بەرز و سەرکۆنەی یەک لە دوای یەکمان بینی، بگرە مەسەلەکە بووە بابەتی رای گشتی".

خالیدە خەلیل لە بابەتەکەی ئەمانەشی نووسیوە:

٠ ئەم پارادۆکسە (دژبەیەکی)ـیە ڕادەی دووفاقییەکە دەردەخات و لۆژیکی پێوان بە دوو پێوەر لە نێو ئەوانەدا ئاشکرا دەکات کە لە بەرامبەر ئازارەکانی فەرمانبەرانی کوردستاندا بێدەنگن.

٠ ئێمە لەگەڵ بڕینی ڕۆزیی هیچ هاوڵاتییەکدا نین، چونکە مووچە مافێکی سروشتییە کە نابێت پێشێل بکرێت، بەتایبەتی خانەنشینان کە تەمەنیان بە خزمەتکردنی ووڵاتەکەیان بەسەر بردووە، بەڵام ئەمە دووفاقی ئەو عەقڵیەتە دەردەخات کە بەغدا ساڵانێکە مامەڵەی پێ لەگەڵ فەرمانبەرانی هەرێمی کوردستان دەکات.

٠ هەمووان دەزانن بڕینی مووچەی فەرمانبەرانی هەرێمی کوردستان پرسێکی سیاسییە، بەڵام ئەو پرسیارەی کە لە هزردا سەرهەڵدەدات ئەوەیە: سندوقی خانەنشینی بۆچی هەڵوەشایەوە، و پارەکەی بۆ کوێ چوو؟ ئایا بەمزووانە بڕینی مووچەی فەرمانبەرانی عێراقی بەدوادا نایەت؟ ئەوکات دووڕووەکان چۆن مامەڵە لەگەڵ پرسی دواکەوتنێکی مووچەدا دەکەن؟

٠ بە دڵنیاییەوە گەلی کورد وەک گەلێکی گەورە دەمێنێتەوە، دەزانێت بە تەواوی کێشەکە لە کوێدایە و ئاگادارە کە دۆزە دادپەروەرانەکەی لە مووچە بەرزترە، و دەکرێت نان بکرێتە کارتێکی گوشاری سیاسی، بەڵام کەرامەت و مافەکانی هەرگیز سازانیان لەسەر ناکرێت .