لە کەرکووک و دیاله 194 کەسی بیانی دەستگیر دەکرێن

ئاڤا نیوز

دەزگای ئاسایشی نیشتمانیی عێراق تۆڕێکی گەورەی قاچاخچێتیی هاووڵاتیی بیانی هەڵدەوەشێنێتەوە و 194 کەسی بیانی لە سنووری هەردوو پارێزگای دیالە و کەرکووک دەستگیر دەکات.

 

ڕاگەیێنراوی فەرمی: دەزگای ئاسایشی نیشتمانیی عێراق ڕایگەیاند، بە پشتبەستن بە زانیاریی هەواڵگری، بەڕێوەبەرایەتیی ئاسایشی دیالە، لەسەر ڕێگای نێوان دیالە و بەغدا دەستی بەسەر بارهەڵگرێکدا گرت کە بە کیسە چیمەنتۆ داپۆشرابوو و لەدیوی ژوورەوەشی 125 کەسی بیانی تێدابوو کە بە شێوەیەکی نایاسایی سنووری عێراقییان بەزاندبوو.

 

زانیاریی زیاتر: دوای لێکۆڵینەوە لەگەڵ قاچاخچییەکان، دانیان بە بوونی حەشارگەیەکی هاووڵاتیانی بیانی لە پارێزگای کەرکووک نا، هێزەکان بە هەماهەنگی لەگەڵ بەڕێوەبەرایەتیی ئاسایشی کەرکووک، هەڵیانکوتایە سەر ئەو شوێنە و لە ئەنجامدا 69 کەسی بیانی دیکەیان دەستگیر کرد.

لەلایەکی دیکەوە: یاسر ئیسکەندەر، ئەندامی لیژنەی ئاسایش و بەرگریی پەرلەمانی عێراق ڕایگەیاند، دیاردەی قاچاخچێتیی بیانییەکان ئاستەنگی ئەمنی مەترسیداری هەیە و پێویستی بە بەدواداچوونی تۆڕەکانی بەڕێوەبردنی ئەم کارانە هەیە.