لە زاخۆ تەنها ئەمڕۆ سێ ئاگركەوتنەوەی جیا ڕوویانداوە

ئاڤا نیوز

بەیانی ئەمڕۆ، سێ ڕووداوی ئاگركەوتنەوەی جیا جیا لە ئیدارەی زاخۆ ڕوویاندا، بەرگریی شارستانیی زاخۆش دەڵێت، ڕووداوەكان هیچ زیانێكی گیانی نەبووە و تەنها زیانی ماددی لێ كەوتوونەتەوە.

چیرۆكی سەرەكی: كاتژمێر 7:20ـی خولەكی بەیانی ئەمڕۆ شەممە، ئاگرێك لە دوو خێوەتی كەمپی بێرسڤێ-2 لە ناحیەی دەركار سەر بە ئیدارەی سەربەخۆی زاخۆ دەكەوێتەوە، دوای ئاگاداركردنەوەی بەڕێوەبەرایەتیی بەرگریی شارستانیی زاخۆ لە ڕووداوەكە، دەستبەجێ تیمەكانی بنكەی بەرگریی شارستانیی دەركار گەیشتوونەتە شوێنی ڕووداوەكە و، توانیویانە ئاگرەكە بەتەواوی كۆنتڕۆڵ بكەن و ڕێگری بكەن لە تەشەنەسەندنی بۆ خێوەتەكانی دیكەی كەمپەكە.

زانیاریی زیاتر: بەر لەو ڕووداوەش بە نیو كاتژمێر، بە دیاریكراوی لە سەعات 6:45ـی خولەكی بەیانی، سەموونخانەیەك لە گەڕەكی ئەردەوانی سەنتەری زاخۆ گڕی گرت و تیمەكانی بنكەی بەرگریی شارستانیی ڕكاڤا لەنزیك ڕووداوەكە بوون و هەر زوو كۆنتڕۆڵی ئاگرەكەیان كرد.

سێیەم ڕووداوی ئاگركەوتنەوەی بەیانیی ئەمڕۆی زاخۆ، سووتانی ئۆتۆمبێلێك بوو لەنزیك كۆشكەكانی زاخۆ، كە توانرا بەزوویی ئاگرەكەی بكوژێندرێتەوە.

ڕاگەیێنراوی فەرمی: لەبارەی ڕووداوەكەی كەمپی بێرسڤێی تایبەت بە ئاوارەكانی شنگال، بەرگریی شارستانیی زاخۆ ڕایگەیاندووە،  ئاگرەكە زیانی ماددی بە دوو خێوەت گەیاندووە، بەڵام خۆشبەختانە هیچ زیانێكی گیانی لێ نەكەوتووەتەوە. هاوكات لێكۆڵینەوە لە هۆكاری ئاگركەوتنەوەكە دەستی پێكردووە.

بە هەمان شێوە، جگە لە زیانی ماددی، دوو ڕووداوەكەی دیكەی ئاگركەوتنەوە هیچ زیانێكی گیانی نەبووە.

باكگراوند: لە سنووری ئیدارەی سەربەخۆی زاخۆ، چوار کەمپی ئاوارەکانی شنگال ھەن، کەمپی بێرسڤێ یەک، کەمپی بێرسڤێ دوو، کەمپی  دەرکار و کەمپی چەم.