چوارچێوەی هەماهەنگی لەڕێگەی ئاڤاوە هەواڵێکی ڕۆژنامەی"شەرقولئەوسەت" ڕەتدەکاتەوە

ئاڤا نیوز

 

چوارچێوەی هەماهەنگی کە زۆربەی لایەنە سیاسییە شیعەکانی عێراق کۆدەکاتەوە، لە ڕێگەی ئاڤاوە ڕاستی و دروستی ئەو نامەیەی ئێران لەبارەی پشتیوانیکردنی عێراق بۆ حزبوڵڵای لوبنانی ئاشکرا دەکات.

 

چیرۆکی سەرەکی: ڕۆژنامەی "شەرقولئەوسەت" لە ڕاپۆرتێکدا ئاشکرای کرد، بۆ دووبارە بونیادنانەوەی تواناكانی حیزبوڵڵای لوبنان، ئێران لە کۆتایی مانگی ئابی 2025 نامەیەکی بۆ دەسەڵاتدارانی عێراق ناردووە و تێیدا داوای پاڵپشتی دارایی و ئاسانکاری بۆ گواستنەوەی پارە و هاوکاری بۆ حیزبوڵڵای لوبنان لە ڕێگەی دەروازەی قائیمەوە کردووە.

 

لێدوانی فەرمی: عیسام گڕێتی، ئەندامی چوارچێوەی هەماهەنگی لە لێدوانێکدا بۆ ئاڤا میدیا وتی، "سەرتاپای ئەو هەواڵەی باس لە نامەیەکی دەسەڵاتدارانی ئێران دەکات سەبارەت بە پشتیوانیی عێراق بۆ حیزبوڵڵا ڕەتدەکەینەوە و دوورە لەڕاستییەوە، بەمەبەستیش لێی تەنیا شێواندنی وێنەی چوارچێوەی هەماهەنگییە بۆ تێوەگلاندنی لە کێشەکانی دەرەوەی سنوورەکانی عێراق".

 

لەلایەکی دیکەوە: ئەحمەد شەریفی، شارەزا لە کاروباری ئەمنی و ستراتیژی، هۆشداری لە هەر دەستپێشخەرییەک لەلایەن عێراقەوە بۆ پشتیوانیکردنی حیزبوڵڵای لوبنانی لە ڕێگەی دەروازەی سنووری قائیمەوە دا و لە لێدوانێکدا بۆ ئاڤا میدیا ڕایگەیاند: پێویستە ژیرانە مامەڵە لەگەڵ هەر داواکارییەکی ئێران کە پەیوەندی بە پاڵپشتی دارایی بۆ حیزبوڵڵای لوبنان هەیە، بکرێت.

 

زانیاریی زیاتر: "ئەم جۆرە هەنگاوە، ئەگەر ڕاست بێت، هەڕەشەیەکی ڕاستەوخۆ بۆ سەر ئاسایش و سەقامگیریی عێراق دروست دەکات و دووچاری فشاری نێودەوڵەتیی و سزای ئابووری دەکاتەوە"، شەریفی ئەمەشی وت.