ئەمریکا هۆشدارییەکی تووند لەبارەی گرووپە چەکدارەکان بە سوودانی دەدات

ئاڤا نیوز

سه‌رۆكوه‌زیرانی عێراق، محه‌ممه‌د شیاع سوودانی، له‌ژێر گوشارێكی زۆری ئه‌مریكادایه‌ بۆ كۆتاییهێنان به‌ گرووپه‌ چه‌كداره‌كانی ناو حه‌شدی شه‌عبی و چه‌ند لایه‌نێكی دیکه‌. به‌پێی زانیارییه‌كانی سایتی "مۆنیتۆر"ـی ئه‌مریكی، واشنتن هه‌ڕه‌شه‌ی له‌ به‌غدا كردووه‌ كه‌ ئه‌گه‌ر به‌مزووانه‌ چاره‌سه‌رێك بۆ ئه‌و گرووپانه‌ نه‌دۆزێته‌وه‌، ئه‌وا دۆخه‌كه‌ ئاڵۆزتر ده‌بێت و كاریگه‌ریی خراپی ده‌بێت.

وێنە گەورەکە: دوای شەڕی داعش، عێراق تاڕادەیەک سەقامگیریی بەخۆیەوە بینی، بەڵام جموجوڵی گرووپە چەکدارەکان لە دەرەوەی بڕیاری حکومەتی ناوەند، دۆخی ئەمنی عێراقی خستووەتە قۆناغێکەوە کە لە هەموو لایەکەوە هۆشداری دەدرێت.

زانیاریی بەدەستهاتوو: بڕیاره‌ هه‌فته‌ی داهاتوو له‌ ئه‌نجوومه‌نی پیرانی ئه‌مریكا گفتوگۆ له‌سه‌ر پڕۆژه‌یاسایه‌كی تایبه‌ت به‌ عێراق بكرێت، كه‌ تێیدا داوای كه‌مكردنه‌وه‌ی رێژه‌ی 40%ـی هاوكارییه‌ داراییه‌كانی ئه‌مریكا بۆ هێزه‌ عێراقییه‌كان ده‌كرێت. ئه‌مه‌ش وه‌ك په‌یامێكی ڕوون له‌لایه‌ن ئه‌مریكاوه‌ بۆ عێراق، كه‌ ده‌بێت به‌په‌له‌ رێوشوێنی پێویست بگرێته‌به‌ر دژی گرووپه‌ چه‌كداره‌كان.

زانیاریی زیاتر: پێنتاگۆن راسپێردراوه‌ بۆ چاودێریكردنی وردی دۆخی عێراق و هه‌نگاوه‌كانی سوودانی له‌باره‌ی ئه‌و میلیشیایانه‌وه‌. ته‌نانه‌ت وه‌زیری جەنگی ئه‌مریكا به‌شێوه‌یه‌كی راسته‌وخۆ چاودێری بارودۆخه‌كه‌ ده‌كات، تاوه‌كو بزانێت عێراق چۆن مامه‌ڵه‌ له‌گه‌ڵ ئه‌م بابه‌ته‌دا ده‌كات. ئه‌گه‌ر به‌غدا پابه‌ندی داواكارییه‌كانی واشنتن نه‌بێت، ئه‌وا ئه‌مریكا "گۆمەکە دەشڵەقێنێت".

لەلایەکی دیکەوە: داوا له‌ سوودانی كراوه‌ كه‌ سه‌رجه‌م ئه‌و گرووپه‌ چه‌كدارانه‌ بدۆزێته‌وه‌ و سزایان بدات، كه‌ له‌ رابردوودا هێرشیان كردووه‌ته‌ سه‌ر هێزه‌كانی ئه‌مریكا له‌ عێراق.