پۆلیس ڕێکلام لە چاڤی لاند قەدەغە دەکات

ئاڤا نیوز

بەپێی زانیارییەکان، سەرجەم ڕێکلامەکانی پڕۆژەی چاڤی لاند ڕاگیراون و پۆلیس بە نووسراوی فەرمی ئاگاداری کەناڵی ئێن ئاڕ تی کردووەتەوە. هۆکاری ئەمەش ئەوەیە کە بەشێک لە پڕۆژەکە و سەرجەم کابینەکانی مانەوەی گەشتیاران لە چاڤی لاند خراونەتە مەزادەوە بۆ فرۆشتن.

چیرۆکی سەرەکی: بە بڕیارێکی وەزارەتی دارایی و بەهۆی کەڵەکەبوونی قەرزێکی زۆر لەسەر شاسوار عەبدولواحید کە خاوەنداریەتی چاڤی لاند دەکات، سەرجەم موڵک و ماڵی ناوبراو خراوەتە مەزاد بۆ فرۆشتن لە نێویشیاندا پڕۆژەی چاڤی لاند.

لێدوانی فەرمی: سەرکەوت ئەحمەد، گوتەبێژی پۆلیسی سلێمانی، بە ئاڤای وت، بەهۆی ئەوەی رۆژی پێنجشەممە پشوو بووە، هیچ ئاگادار نەکراوەتەوە لە گەیاندنی تەبلیغاتەکە بۆ ئێن ئاڕ تی، بڕیارە سبەی ڕوونکردنەوەی زیاتر لەسەر ئەو بابەتە بڵاوبکەنەوە.

لەلایەکی دیکەوە: بەپێی زانیارییەکانی ئاڤا، داوا لە ژمارەیەک لە کارمەندانی ئێن ئاڕ تی کراوە کە لە پڕۆژەی کورد سیتی دەژین، تا کۆتایی مانگ شووقەکانیان چۆڵ بکەن، چونکە بڕیارە ئەوانیش هاوشێوەی موڵکەکانی دیکەی شاسوار عەبدولواحید دەستیان بەسەردا بگیرێت و بفرۆشرێن.