پردێک لەسەر ڕێگەی بەغدا - کەربەلا ڕووخا و سێ ئۆتۆمبێل کەوتوونەتە ژێری

ئاڤا نیوز

ئێوارەی ئەمڕۆ شەممە، پردی "مفرەگ عەتیش" لەسەر ڕێگەی کەربەلا-بەغدا کە لە قۆناغی دروستکردندا بووە، داڕوخاوە و کەوتووەتە سەر چەند ئۆتۆمبێڵێک. بەپێی زانیارییە سەرەتاییەکان چەند کەسێک برینداربوونە.

چیرۆکی سەرەکی: پردی مفرەگ عەتیش لەسەر ڕێگەی کەربەلا-بەغدا لە قۆناغی دروستکردندا بووە، بەر لەوەی تەواو بکرێت و هاتووچۆی بەسەرەوە بکرێت، پردەکە بەسەر ژمارەیەک هاووڵاتی و ئۆتۆمبێلدا داڕما کە لەژێریدا تێپەڕ دەبوون. تیمەکانی فریاکەوتن ئێستا گەیشتوونەتە شوێنی ڕووداوەکە و سەرقاڵی دەرهێنانی بریندارەکانن لەژێر داروپەردووی پردە داڕووخاوەکەدا.

لێدوانی فەرمی: سەلیم کازم، بەرێوبەری ڕاگەیاندنی تەندروستیی کەربەلا بە ئاڤا میدیای ڕاگەیاند، تا ئێستا پێنج بریندار گەیشتوونەتە نەخۆشخانەی حوسەیینییە و چارەسەر وەردەگرن، "هێشتا هەواڵی مردنی هیچیان بە دەست ئێمە نەگەیشتووە".

سەلیم کازم ڕوونیشیکردەوە، "هەموو ئەو بریندارانەی گەیشتوونەتە نەخۆشخانەی حوسێنییە، برینەکانیان سووک بووە و تا ئێستاش هیچ بریندارێکی دیکەمان پێنەگەیشتووە".

لەلایەکی دیکەوە: نەسیف جاسم خەتابی، پارێزگاری کەربەلا ڕایگەیاند، دوو ئۆتۆمبێل کەوتوونەتە ژێر پردەکە و یەکێکیان دەرهێنراوە و هەوڵەکان بەردەوامن بۆ دەرهێنانی ئۆتۆمبێڵی دووەم.