زاخۆ دەبێتە خاوەنی کارەبای 24 کاتژمێری

ئاڤا نیوز

تاقیکردنەوەی گوشاری بۆ کارەبای 24 کاتژمێری لە زاخۆ دەکرێت و بڕیارە مانگی داهاتوو پڕۆژەی ڕووناکی لە ئیدارە سەربەخۆکە جێبەجێ بکرێت.

وێنە گەورەکە: هاووڵاتیان لە ناوەندی شارەکانی هەولێر، دهۆک، سلێمانی و هەڵەبجە دەستیان بە پڕۆژەی ڕووناکی بۆ کارەبای بەردەوام گەیشتووە، ئێستا پڕۆژەکە لە ئیدارە سەربەخۆکان و قەزا و ناحیەکان فراوان دەکرێت و تاوەکو کۆتایی ساڵی 2026، هەموو هاووڵاتیانی هەرێمی کوردستان دەبنە خاوەنی کارەبای 24 کاتژمێری.

ڕاگەیێنراوی فەرمی: بەڕێوەبەرایەتیی گشتیی کارەبای زاخۆ ڕایگەیاند: تاقیکردنەوەی گوشاری لەسەر تۆڕی کارەبای زاخۆ دەکرێت، تاقیکردنەوەکە هەوڵێكە بۆ دیاریکردنی کەموکوڕییەکانی گواستنەوە و دابەشکردنی کارەبا لە زاخۆ، بۆیە ماوەی دوو ڕۆژ بە بەردەوامی کارەبا دەبێت و تەنها لە دۆخە نەخوازراوەکاندا دەپچڕێت.

ئەوەی پێویستە بیزانیت: ئەم هەوڵە بۆ ڕێکخستنی تۆڕەکانی کارەبا و نەهێشتنی ئاستنەگەکانی گواستنەوە و دابەشکردنییەتی، لە داهاتوو دا تەواوی زاخۆ دەبێتە خاوەنی پڕۆژەی ڕووناکی.

پەیامی فەرمی: پێشتر عەزیز ئەحمەد، جێگری بەڕێوەبەری نووسینگەی سەرۆکوەزیران مەسرور بارزانی لە ئێکس ڕایگەیاندبوو: تا مانگی 10ـی ئەمساڵ، کارەبای 24 کاتژمێری دەگاتە تەواوی ئیدارەی زاخۆ، بەمەش کارەبا بڕان و سرکێت هەڵدانەوە نامێنن، کارەبایەکی بەردەوام و بە نرخێکی گونجاو، کە دەبوو چەندین ساڵ بەر لە ئێستا دابین بکرایە، ئێستا بەردەست دەبێت.