لە بەغدا بەهۆی شەڕ عەشایەرییەوە چوار کەس کوژران و 10ی دیکەش برینداربوون

ئاڤا نیوز

شەوی ڕابردوو لە ناوچەیەکی ڕۆژهەڵاتی بەغدای پایتەخت، شەڕی عەشایەریی ڕوویدا و کاتێک هێزە ئەمنییەکان گەیشتنە شوێنی ڕووداوەکە ڕووبەڕووبوونەوە لەنێوان ئەوان و چەکداری هۆزەکاندا دروستبوو، لە ئەنجامیشدا دوو چەکدار و دوو ئەفسەری وەزارەتی ناوخۆی عێراق گیانیان لەدەستدا و زیاتر لە 10 کەسیش لە هەردوولا برینداربوون.

وێنە گەورەکە: یەکێک لە ئاستەنگییە سەرەکییەکانی بەردەم دۆخی ئەمنیی لە عێراق بریتییە لە بوونی چەک لە دەرەوەی دەوڵەت لەوانەش بوونی گرووپی چەکداری مەزهەبی و چەکداری هۆزەکان، ئەم چەکانەش لە هەموو ناکۆکییەکدا بەکاردەهێنرێن و خەڵک بەهۆیەوە دەکوژرێن و برینداردەبن، هەوڵەکانی حکومەتی عێراقیش لەم بوارەدا بەردەوامن بەڵام کۆنتڕۆڵکردنی چەک لەبەر چەندین هۆکار لەوانە سروشتی کۆمەڵگەی عێراقی بە سستی دەچێتەپێشەوە.

ڕاگەیێنراوی فەرمی: وەزارەتی ناوخۆی عێراق بڵاویکردەوە، ئێوارەی دوێنێ لە ناوچەی سەعادەی بەشی ڕەسافە لە بەغدا، ناکۆکی عەشایەری دروستبووە و کاتێک هێزە ئەمنییەکان گەیشتوونەتە شوێنەکە لەلایەن چەکدارەکانەوە ڕاستەوخۆ دەستڕێژیی گولـلەیان لێکراوە، هێزە ئەمنییەکانیش بەمەبەستی دەستگیرکردنی تاوانبارەکان وەڵامی هێرشەکانیان داوەتەوە.

وەزارەتەکە دەشڵێت، بەهۆی پێکدادانەکان دوو لە هێرشکارەکان کوژراون و پێنجی دیکەش برینداربوون، شەش کەسیشیان لێ دەستگیرکراوە و گەڕانیش بەدوای هەموو ئەوانە بەردەوامە کە دەستیان هەبووە لەو شەڕە عەشایەرییە و ڕووبەڕووی هێزە ئەمنییەکان بوونەتەوە، هەوڵەکانیش تا دەستگیرکردنی سەرجەمیان بەردەوام دەبن.

گۆشەیەکی دیکەی دیمەنەکە: وەزارەتی ناوخۆ گیانلەدەستدانی دوو ئەفسەر و برینداربوونی پێنج ئەندامی پۆلیسی فیدڕاڵیشی لە ئەنجامی ئەو شەڕ و پێکدادانە ڕاگەیاندووە، جەختیشیکردووەتەوە کە ئۆپەراسیۆنی دەستگیرکردنی سەرجەم تۆمەتباران و سەپاندنی یاسا بەردەوام دەبێت و سەرجەم تۆمەتباران ڕووبەڕووی دادگا دەکرێنەوە.

فەرماندەیی ئۆپەراسیۆنە هاوبەشەکانی بەغداش ڕایگەیاند، هەر لایەنێک بیەوێت ئاشتی کۆمەڵایەتی بخاتە مەترسییەوە و ئاژاوەی عەشایەریی و شەڕی چەکداریی ساز بکات، بە توندی وەڵام دەدرێتەوە و لە ڕووبەڕووبوونەوەیان درێغی ناکەن، ئاشکراشی کرد کە شەوی ڕابردوو ئەندامانی هێزە ئەمنییەکان لەکاتی هەوڵدان بۆ چارەسەرکردنی کێشە عەشایەرییەکە گیانیان لەدەستداوە و برینداربوون و ئەوان بەشێک نەبوون لە شەڕەکە.