لە هەولێر پڕۆژەیەکی گرنگی ڕێگاوبان لە قۆناغی کۆتایی نزیکبووەتەوە

ئاڤا نیوز

پڕۆژەیەکی گرنگی ڕێگاوبان کە جووتسایدی کەسنەزان - گۆمەسپانە ئێستا لە قۆناغی قیرکردندایە، پارێزگاری هەولێریش دەڵێت: بەم نزیکانە ڕێگاکە دەکرێتەوە.

وێنە گەورەکە: پڕۆژەی ڕێگای جووتسایدی کەسنەزان-گۆمەسپان، لەسەر فەرمان و ڕاسپاردەی سەرۆکوەزیران مەسرور بارزانی چووەتە بواری جێبەجێکردنەوە،  یەکێکە لە پڕۆژە ستراتیژییەکانی کابینەی نۆی حکومەتی هەرێمی کوردستانە. 

لێدوانی فەرمی: ئومێد خۆشناو، پارێزگاری هەولێر بە ئاڤا میدیای ڕاگەیاند: کارکردن لە پڕۆژەکانی ڕێگای جووتسایدی کەسنەزان - گۆمەسپان، هەروەها ڕێگای جووتسایدی گۆمەسپان-سماقوڵی بە دەستی کاری خۆماڵی بەردەوامە. 

پارێزگاری هەولێر وتی: ئێستا سایدێکی ڕێگای جووتسایدی کەسنەزان-گۆمەسپان لە قۆناغی قیرکردندایە.

زانیاریی زیاتر: ئەم دوو پڕۆژەیە لە چوارچێوەی گەشەپێدانی بەنداوی گۆمەسپانە، کە پڕۆژەیەکی گەشتیاری و پەرەپێدانی ئابوورییە.

ئەوەی پێویستە بیزانیت: ڕێگای جووتسایدی هەولێر-سماقوڵییش، ڕێگایەکی ستراتیژی گرنگە و پارێزگای هەولێر و سلێمانی پێکەوە دەبەستێتەوە، درێژی ڕێگاکەش 38 کیلۆمەترە.