شەش کەس لەسەر ڕووخانی پردەکەی کەربەلا دەستگیردەکرێن

ئاڤا نیوز

دادگای کەربەلا فەرمانی دەستگیرکردنی بۆ پێنج ئەندازیار و ئەفسەری پۆلیسی هاتووچۆی ئەو شوێنە دەرکرد کە ئێوارەی دوێنێ پردێکی تەواونەبوو تیایدا ڕووخا، لەکاتێکدا هێشتا پردەکە لەژێر دروستکردندا بووە و هیچ کەسێک بەسەریدا نەڕۆیشتبوو.

وێنە گەورەکە: ئێوارەی دوێنێ لە پارێزگای کەربەلای ناوەڕاستی عێراق پردێک پێش تەواوبوونی ڕووخا، لە ئەنجامیشدا پێنج کەس برینداربوون و دوو ئۆتۆمبێلیش کەوتنەژێر پردە ڕووخاوەکە، بەڕێوەبەری ڕێگاوبانی پارێزگاکەش ئاشکرایکرد پردەکە لە قۆناغی دروستکردندابووە و لە کاتی چیمەنتۆکردنی پردەکە یەکێک لە ڕاگرە ئاسنەکان ترازاوە و دوو ئۆتۆمبێلیش بەخێرایی بە ژێر پردەکەدا ڕۆیشتوون و کەوتوونەتەژێرەوە.

زانیاریی بەدەستهاتوو: ئاژانسی نونی کەربەلا کە میدیایەکی ناوخۆیی پارێزگاکەیە بڵاویکردەوە، لەسەر ڕووخانی پردەکە و بەگوێرەی ماددەی 340 لە یاسای سزادان (زیانگەیاندن بە ماڵی گشتی بەمەبەست کە سزاکەی تا حەوت ساڵ زیندانیکردنە)، دادگاکەی پارێزگاکەیان فەرمانی دەستگیرکردنی بۆ پێنج ئەندازیار و ئەفسەری پۆلیسی هاتووچۆی شوێنی ڕووداوەکە دەرکرد.

دادگای کەربەلا داواشیکردووە ئەو کەسانە لەژێر لێکۆڵینەوە و لە زیندان بهێڵرێنەوە، تا ئەوکاتەی لیژنەکەی سەرۆکوەزیران کە تایبەت بە ئەم ڕووداوە پێکهێنراوە، کارەکانی خۆی تەواو دەکات و لایەنی بەرپرس و کەمتەرخەم دیاریی دەکات.

ئەوەی لەبارەیەوە دەگوترێت: ئەو کۆمپانیایەی سەرپەرشتی پردەکەی کردووە ناوی "شموخ عێراق"ـە، بەڵێندەرەکە ناوی شێخ عەباس فەتلاوییە و بەڕێوەبەری جێبەجێکاریش ئەحمەد عەباسە، دەوترێت پڕۆژەکە بڕیاربووە لە 450 ڕۆژدا جێبەجێبکرێت و 14 ملیار دیناری بۆ تەرخانکراوە، لە پڕۆژەکەشدا کرێکاری میسری، سووریی و پاکستانی کاریان کردووە.

بەشێک تۆڕە کۆمەڵایەتییەکانیش ناوی بریندارەکانیان بڵاوکردووەتەوە و بریتین لە:

عەبدوڵا ئیبراهیم / سووری 22 ساڵ
ڕەمەزان داود / سووری 23 ساڵ
ئەسیب ئەحمەدی/ ئەفغانی 35 ساڵ
یوسف ناسری / ئەفغانی 25 ساڵ
حوسێن جابر 16 ساڵ

لەلایەکی دیکەوە: بەرگری شارستانی کەربەلاش بڵاویکردەوە، شەوی ڕابردوو ئەوان هەشت کەسیان ڕزگارکردووە کە بەهۆی ڕووخانی پردەکەی قەزای حوسێنییە گیریانخواردبوو و پرۆسەی ڕزگارکردنی سەرنشینی ئۆتۆمبێلێکیش تا درەنگانی شەوی بەردەوامی هەبووە.