بە تالیۆنی ژینگەپارێزی بارزان 13 شوێنی ئاوی خواردنەوەی بۆ باڵندە و ئاژەڵی کێوی دروست کردووە

ئاڤا نیوز


ئەمساڵ تەنیا لە سنووری بارزان 13 شوێنی ئاوخواردنەوە بۆ باڵندە و ئاژەڵی کێوی لەلایەن بەتالیۆنی ژینگەپارێزی بارزان دروست کراون.

وێنە گەورەکە: بەهۆی وشکە ساڵیەوە بەشێکی زۆری ئاوی کانی و سەرچاوەی ئاوی سروشتی لە چیا و دەشتەکانی هەرێمی کوردستان کەمی کردووە بەشێکیشیان بە تەواوی وشک بوون، بۆ کەمکردنەوەی کاریگەری ئەو وشکە ساڵییە لە بەشێکی زۆری ناوچەکانی کوردستان ژینگەپارێزان شوێنی ئاوخواردنەوە لە شاخەکان دروست دەکەن.

لێدوانی فەرمی: سدیق حەسەن، بەرپرسی بەشی ڕاگەیاندن و ڕۆشنبیری بەتالیۆنی ژینگەپارێزی بارزان بە ئاڤا میدیای گوت: بەهاوکاری نووسینگەی مەلا مستەفا بارزانی، تا ئێستا 13 شوێنی ئاو خواردنەوەمان بۆ باڵندە و ئاژەڵە کێویەکان درووستکردووە و هەزاران گیانەوەری جۆراوجۆر سوودیان لێ دەبینن، بەردەوامیش ئاو بۆ ئەو شوێنانە دابین دەکەین.

زانیاریی زیاتر: ژینگەپارێزی لە سنووری بارزان هەر لە کۆنەوە بووەتە بەشێک لە کولتووری دەڤەرەکە، بۆیە سەدان جۆرەی باڵندە و ئاژەڵە کێوییەکان لەو سنوورە پارێزراون، بەجۆرێک هەندێک لەو گیانەورە کێوییانە ترسیان لە مرۆڤ نەماوە و دێنە ناو گوندەکان.

بۆچی گرنگە: دروست کردنی شوێنی ئاو خواردنەوە و دابینکردنی ئاو لە چیاکان، ڕێگری دەکات لە کۆچ کردن و لەناوچوونی باڵندە و ئاژەڵی کێوی بەهۆی گەرما و تینوێتی، لە هەمان کاتیش پارێزگاری لە سرووشت و ژینگەی ئەو ناوچانە دەکات.