دوایین زانیاریی لەبارەی ئەو تەرمەی لە لالەزار سووتا و ناناسرێتەوە

ئاڤا نیوز

ماوەی 16 ڕۆژە تەرمێکی سووتاو کە لە شوێنی هێرشەکەی لالەزار دۆزراوەتەوە، لە پەیمانگەی پزیشکی دادی سلێمانی هەڵگیراوە و کەس خۆی لێ بەخاوەن ناکا.

چیرۆکی سەرەکی: هەر ئەو ڕۆژەی کوژراوەکانی شەڕەکەی لالەزار گەیێنرانە پەیمانگەی دادی پزیشکیی سلێمانی، بەشێکیان ناسرانەوە و خێزانەکانیان تەرمەکانیان وەرگرتووە، بەڵام دوای زیاتر لە دوو هەفتە، هێشتا تەرمێک نەناسراوەتەوە و کەسوکاری بەدەمییەوە نەچوون.

لێدوانی فەرمی: بەرزان محەمەد، بەڕێوەبەری پزیشکی دادی سلێمانی بە چۆمان مەحموود، پەیامنێری ئاڤای ڕاگەیاند: تەرمەکە بە جۆرێک سووتاوە کە ناناسرێتەوە و ئاسەواری ناسینەوەی تێدا نەماوە، بۆیە داوا لە کەسوکاری ئەو کەسانە دەکەین کە لە شەڕەکە لالەزار زانیاریی بێسەروشوێن بوون، سەردانمان بکەن و پشکنینی دی ئێن ئەی بکەن. تاوەکو بزانین ئەو تەرمە هی چ خانەوادەیەکە.

زانیاریی زیاتر: ئاڤا میدیا زانیویەتی کۆمەڵێک خێزان خۆیان بۆ پشکنینی دی ئێن ئەی ناونووس کردووە، تاوەکو ئێستاش دوو خێزان پشکنینیان کردووە و چاوەڕێی ئەنجامەکان و ڕۆژانی داهاتوو ئەنجامەکان دەردەچن. پاش ئەوەی سامپلەکان بۆ دی ئێن ئەی وەرگیران و پشکنینیان بۆ کرا، پەیمانگەی دادی پزیشکیی سلێمانی ئەنجامی کۆتایی پشکنینەکان ڕادەگەیێنێت.

لەلایەکی دیکەوە: دەستەی سەربەخۆیی مافی مرۆڤ ڕایگەیاند، تاوەکو ئێستا چارەنووسی بەشێک لە گیراوەکانی لالەزار نادیارە و لەلایەن هێزە ئەمنییەکانی سنوورەکەوە ڕێگە نادرێت هەموو دەستگیرکراوان ببینین، تاوەکو بزانین دۆخی تەندروستییان چۆنە و چۆن مامەڵەیان لەگەڵ کراوە.

باکگراوند: بەرەبەیانی هەینی 22-8-2025، زیاتر لە 10 هەزار چەکداری دژەتیرۆر، کۆماندۆ و ئاسایشی یەکێتی بە تانک، تۆپ، درۆن و دۆشکە و بیکەیسی و چەندین چەکی جیاوازەوە هێرشیانکردە سەر هۆتێل لالەزار و شوێنی مانەوەی لاهوور شێخ جەنگی لە گەڕەکی سەرچناری شاری سلێمانی، ڕووداوەکە ترس و نیگەرانیی زۆری لەلای هاونیشتمانیان دروستکرد، سەدان گەشتیاری بیانیش ڕاستەوخۆ سلێمانیان بەجێهێشت.