بەرگریی شارستانیی کەربەلا: دوو کەس بەهۆی ڕووخانی پردەکەی کەربەلا گیانیان لەدەستداوە

ئاڤا نیوز

بەڕێوەبەرایەتیی بەرگریی شارستانی کەربەلا ڕایگەیاند، لە ڕووداوی ڕووخانی پردەکەی کەربەلا دوو کەس گیانیان لەدەستداوە و حەوت کەسیش ڕزگارکراون، پرۆسەی گەڕانیش بەدوای ئەوانەی گومان دەکرا لە ژێر پردەکەدا مابن دوای 13 کاتژمێر کۆتاییهات.

وێنە گەورەکە: ئێوارەی دوێنێ لە پارێزگای کەربەلای ناوەڕاستی عێراق پردێک پێش تەواوبوونی ڕووخا، بەڕێوەبەری ڕێگاوبانی پارێزگاکەش ئاشکرایکرد پردەکە لە قۆناغی دروستکردندابووە و لە کاتی چیمەنتۆکردنی پردەکە یەکێک لە ڕاگرە ئاسنەکان ترازاوە و دوو ئۆتۆمبێلیش بەخێرایی بە ژێر پردەکەدا ڕۆیشتوون و کەوتوونەتەژێرەوە.

 

ڕاگەیێنراوی فەرمی: بەڕێوەبەرایەتیی بەرگریی شارستانی کەربەلا بڵاویکردەوە، دوای 13 کاتژمێر پرۆسەی گەڕان و پشکنین بەدوای ئەو کەسانەی کەوتبوونەژێر پردە ڕووخاوەکەی قەزای حوسێنیە کۆتاییهات، لە ئەنجامیشدا حەوت کەس بە زیندوویی ڕزگارکران و تەرمی دوو کەسیش دۆزرانەوە.

 

دەشڵێت، پرۆسەی گەڕان و پشکنینەکان زۆر قورس و ئاڵۆزبوون، چونکە هەموو پرۆسەکە لە ناوەندێکدا بوو کە بەرزییەکەی کەمتر لە  نیو مەتر بووە، بۆیەش هەر کارێکی هەڵە و حساب بۆ نەکراوە، گیانی ئەوانەی دەخستەمەترسییەوە کە لە ژێر پردە ڕووخاوەکە چاوەڕێی ڕزگارکردن بوون.