وەزیری دەرەوەی ئێران پەیامێک ئاڕاستەی دۆناڵد ترەمپ دەکات

ئاڤا نیوز

وەزیری دەرەوەی ئێران پەیامێک ئاراستەی سەرۆکی ئەمریکا دەکات و ڕایدەگەیەنێت، ئەگەر ڕێگەی دیپلۆماسی نەگیرێتەبەر ڕۆژهەڵاتی ناوەڕاست ڕووبەڕووی دۆخێکی وێرانکەر دەبێتەوە.

 

وێنە گەورەکە: دوای "جەنگی 12 ڕۆژە" ی نێوان ئیسرائیل و ئێران و بەشداریی ئەمریکا بە هێرشکردنە سەر پێگە ئەتۆمییەکانی نەتەنز، فۆردۆ و ئەسفەهان، واشنتن بەردەوام هەوڵ دەدات ئێران بگەڕێنێتەوە سەر مێزی گفتوگۆ و دانوستاندن بەڵام تاران مەرجی هەیە بۆ کۆبوونەوە.

 

لێدوانی فەرمی: عەباس عێراقچی، وەزیری دەرەوەی ئێران لە چاوپێکەوتنێکدا لەگەڵ ڕۆژنامەی گاردیانی بەریتانی هۆشداری دا لە وێرانبوونی ڕۆژهەڵاتی ناوەڕاست لە ئەگەری هێرشی ئیسرائیل و ئەمریکا بۆ سەر ئێران و ڕایگەیاند: ئەگەر هەوڵە دیپلۆماسییەکان بۆ گەشتن بە ڕێککەوتن شکست بێنن دەرئەنجامی زۆر ترسناکی دەبێت و وێرانکەر دەبن بۆ ڕۆژهەڵاتی ناوەڕاست، گەر دۆناڵد ترەمپ، سەرۆکی ئەمریکا لەگەڵ ئەورووپا دەیانەوێت ناکۆکییەکان چارەسەر بکرێت لەگەڵ ئێران، دەبێت ڕێگەی دیپلۆماسی بگرنەبەر و کاتی پێویستی پێبدەن، نابێت بیر لە بژاردەی دەرەوەی دیپلۆماسی بکەنەوە. 

 

زانیاریی زیاتر: وەزیری دەرەوەی ئێران لە بەشێکی وتەکانیدا ئامادەیی ئێرانی بۆ چارەسەری دیپلۆماسی دەربڕیووە و ڕایگەیاند، تاران ئامادەیە ڕێککەوتنامەیەکی ڕاستەقینە و هەمیشەیی ئەنجام بدات و پیتاندنی یۆرانیۆم لە ژێر چاودێریی ئاژانسی نێودەوڵەتیی وزەی ئەتۆم بێت بەڵام دەبێت سزاکانی سەر ئێران هەڵبگیرێن.