هێزەكانی كۆماندۆ ئۆفیسی ژمارەیەک ڕێكخراوی ناوخۆیی و بیانی لە سلێمانی تاڵان دەكەن: فڵچەی ددان شوشتنیش براوە

ئاڤا نیوز

 

لەكاتی هێرشکردنە سەر لالەزار، هێزەكانی كۆماندۆی یەکێتی هەڵیانكووتاوەتە سەر ئۆفیسی ژمارەیەك ڕێكخراوی ناوخۆیی و بیانی و سەرجەم كەلوپەلەكانیان بردوون، سەنتەری میترۆش نیگەرانە لەوەی كە ئەمجۆرە ڕەفتارە، هەرێمی كوردستان بكاتە زۆنی سوور بۆ كاری ڕێكخراوە بیانییەكان.

 

وێنە گەورەكە: تەلاری (پایا) دەكەوێتە گەڕەكی سەرچناری شاری سلێمانی و نزیكە لە ماڵی لاهوور شێخ جەنگی، سەرۆكی بەرەی گەل و هۆتێل لالەزار، ئۆفیسی پێنج ڕێكخراوی ناوخۆیی و نێودەوڵەتی لەو تەلارە هەن، بەرەبەیانیی ڕۆژی 22ـی ئابی 2025، لەكاتی شەڕە خوێناوییەكەی لالەزار، هێزی چەكداری یەکێتی هەڵیانكووتاوەتە سەر ئەو تەلارە و سەرجەم كەرەستەكانی ناو ئۆفیسەكانی ڕێكخراوەكانیان بردووە.

 

چی ڕووی دا: سەنتەری میترۆ بۆ داكۆكیكردن لە مافی ڕۆژنامەنووسان زانیویەتی، هێزەكە سەرجەم كەرەستەی ناو ئۆفیسی ڕێكخراوەكانی بردووە، لەوانەش: قاسەی پارە بەوەی لەناویدا بووە كە پارەی پرۆژەكان بووە، چوار ئامێری چاپكردنی ڕەنگاورەنگ و ڕەش و سپی، تەلەفۆنی سەتەلایتی سورەییا، چەند سێتێكی كۆمپیوتەر، نۆ لاپتۆپی جۆراوجۆر، سێتی داتاشۆ، سێ‌ سێتی كامێرای سۆنی و كانون، ئامێری مای فای ئاسیاسێل و فاست لینك و ئای كیو، ئامێری ژماردنی پارە، چەند شاشەیەكی تیڤی، پاسپۆرتی كارمەند، چەند هیدفۆنێك، سپیكەر، مۆبایل، چەندین یو پی ئێس، تا دەگاتە كەرەستەی زۆر زۆر سادەییش وەك: فلچەی ددان شتن و ئامێری ڕیشتاشینی كارمەندان. 

لە ڕێكخراوی دیکە مەكینەی خەیاتی، مەكینەی ئۆڤەر، نەخش و ئوتوو، درێل، گسكی كارەبا، جزدان بە پارەوە و جانتاشیان بردوون.

 

زانیاریی زیاتر: ئەو ڕێكخراوانەی تاڵانكراون بریتین لە، ڕێكخراوی بەهرەدار بۆ پەرەپێدانی گەنجان، پایا ئەیجێنسی، ئارت پلەس، پارێزەرانی ئاوی عێراق و كوردستان، ڕێكخراوی (UPP) كە بە (Un Ponte Per) ناسراوە و، ڕێكخراوێكی قازانج نەویستی سەربەخۆی ئیتاڵییە، كار دەكات بۆ دروستكردنی پردی ئاشتی و بەهێزكردنی ڕێكخراوەكانی كۆمەڵگەی مەدەنی لە ناوچە جێناكۆكەكانی وەك عێراق و ڕۆژهەڵاتی ناوەڕاست و باكووری ئەفریقا، لە ڕێگەی پڕۆژەی گەشەپێدانی كۆمەڵگا، گەنجان، بەهێزكردنی ژنان، و پاڵپشتیكردنی پەنابەران.

 

ڕاگەیێنراوی فەرمی: سەنتەری میترۆ بۆ داكۆكیكردن لە مافی ڕۆژنامەنووسان، وێڕای سەركۆنەكردنی هێرشی چەكداران بۆ سەر نووسینگەی ڕێكخراوە ناوخۆیی و بیانییەكان، ئەو ڕەفتارە بە پێشێلكاری ڕوونی یاسای مرۆیی نێودەوڵەتی وەسف دەكات و، مەترسی ئەوەشی هەیە هەرێمی كوردستان بكاتە زۆنی سوور و شوێنێكی نائارام  بۆ كاری رێكخراوی بیانی.

 

ئەوەی پێویستە بیزانیت: ئەو ڕێكخراوانە بەهیچ جۆرێك پەیوەندییان بە ململانێی سیاسی و چەكدارییەوە نەبووە و هیچ پاساوێك بۆ دەستگرتن بەسەر كەلوپەلەكانیان نییە.

 

زانیاریی ئاڤا: ئاڤا زانیویەتی ئەو ڕێكخراوانە ئامادە نین بە ناوی خۆیان زانیاری بدەن، تەنانەت فەرمانگەی ڕێكخراوە ناحكومییەكانیان لەو ڕووداوە ئاگادار نەكردووەتەوە، ئەوەش لەكاتێكدا لەو فەرمانگەیە بەفەرمی تۆمار كراون و مۆڵەتی كاركردنیان هەیە.

هەنگاوی داهاتوو: حكومەتی هەرێمی كوردستان لەبارەی ئەو ڕاگەیێنراوەی سەنتەری میترۆ كۆدەبێتەوە و بەدواداچوونی ورد بۆ بابەتەكە دەكات.