مانگگیران لە هەرێمی کوردستان و عێراق دەستیپێکرد

ئاڤا نیوز

ئەمڕۆ ئێوارە لە کوردستان و عێراق و چەندین وڵات مانگگیران دەستیێکرد و پرۆسەکە پێنج کاتژمێر و نیو دەخایەنێت، لەڕووی فەلەکناسییەوە 18ساڵە ڕووداوی گەردوونی وا ڕووینەداوە.

لێدوانی فەرمی: ڕۆژی شەممە ڕێبەر ڕۆستەم، سەرۆکی سەنتەری کوردستان بۆ ئەستێرەناسی بە ئاڤای وتووە: ڕۆژی یەکشەممە کاتژمێر 6:28 خولەک مانگگیرانی نیمچە سێبەر دەست پێ دەکات، کاتژمێر 7:28 خولەک مانگگیرانی سێبەر دروست دەبێت.

کاریگەری و لێکەوتەکان: ئەو ئەستێرەناسە گوتیشی، لە کاتژمێر 8:30 خولەک مانگگیرانی تەواو ڕوودەدات، کاتژمێر 9:10 خولەک مانگگیران لە بەرزترین ئاست دەبێت، بەڵام لە کاتژمێر 9:50 خولەک وردە وردە مانگگیرانەکە کاڵ دەبێتەوە، کاتژمێر 11:00ی شەو مانگگیرانی سێبەر کۆتایی دێت.

ڕێبەر ڕۆستەم ڕوونی کردەوە، تەواوی پڕۆسەکە لە سەرەتاوە تا کۆتایی پێنج کاتژمێر و نیو دەخایەنێت.

ئەوەی پێویستە بیزانیت: ئەم ڕووداوە کاتێک ڕوودەدات کە مانگ و خۆر بکەونە سەر یەک هێڵیی تەریب و زەوی بکەوێتە نێوان مانگ و خۆر.

ئەمەش بزانە: ئەم مانگگیرانە لە هەموو دنیا نییە، خەڵکی وڵاتانی ڕۆژهەڵاتی ناوەڕاست و بەشێكی ئەوروپا و ئەفریقیا و ئاسیا و بەشێکی ئوسترالیا دەیبینن.