چیرۆکی پێکەنیناوی بەشێک لە کاندیدانی هەڵبژاردن لە عێراق

ئاڤا نیوز

 

لەگەڵ نزیکبوونەوەی وادەی هەڵبژاردنەکان، کاندیدەکان بە شێوازی جیاواز هەوڵ دەدەن سەرنجی دەنگدەران بۆ لای خۆیان ڕابکێشن، بەڵام هەندێکجار ئەم هەوڵانە دەبنە جێی پێکەنین و گاڵتەجاڕی. نوێترین نموونە، کاندیدێک لە پارێزگای دیالە، بە "پڕۆژەیەکی ئاوەدانی" بووەتە مایەی قسە و باسی گەرمی تۆڕە کۆمەڵایەتییەکان.

 

بڵاوکراوەی فەرمی: نووسینگەی ڕۆژنامەوانی کاندیدێک (کە پەرلەمانتاری ئێستاشە) لە پەیجی فەیسبووکی خۆیەوە هەواڵێکی بڵاوکردووەتەوە و نوسیەویەتی بە "هەوڵەکانی ئەم خاتوونە پەرلەمانتارە و بە پارەی گیرفانی خۆی"، پردێک لە گوندی "دەلی عەباس"ی دیالە دروستکراوە. لە هەواڵەکەدا نووسراوە کە ئەم پردە لەسەر "زەلکاو" دروستکراوە و هەردوو بەری ڕاست و چەپی گوندەکە بەیەکەوە دەبەستێتەوە.

 

زانیاریی زیاتر: ئەوەی ئەم بابەتەی کردووەتە جێگەی گاڵتەجاڕی، وێنە و وردەکارییەکانی پڕۆژەکەیە. بەپێی وێنەکان، پردەکە زۆر بچووکە و پێدەچێت تەنها یەک یان دوو کیس چیمەنتۆ و بڕێکی کەم شیشی تێچووبێت. بەڵام کاندیدەکە وێنەیەکی گەورەی خۆی لە نزیک پردەکە هەڵواسیوە کە لە خودی پردەکە گەورەترە.

 

کاردانەوەکان: ئەم دیمەنە بووەتە باس و خواستی گەرمی تۆڕە کۆمەڵایەتییەکان و بەکارهێنەران بە شێوازی جۆراوجۆر گاڵتەیان پێکردووە. یەکێک لە بەکارهێنەران نووسیویەتی: "لە وڵاتی وا هەیە، پردی نەفەقی (تونێل) وایان دروستکردووە کە کاتژمێرێک بە ژێر ئاودا دەڕوات، بەڵام وێنەی یەک کەسیشیان پێدا هەڵنەواسیووە. ئێستا ئەم خاتوونە دوو کیسە چیمەنتۆی کڕیوە، بەڵام پارەی پێنج کیسە چیمەنتۆی بە وێنەکەی داوە کە ئەوەندە گەورەیە."

 

بە تەنیشت ئەم بابەتەوە: پێشتر کاندیدەکان بەشێوازی جۆراوجۆر هەڵمەتی هەڵبژاردنیان بەڕێوەدەبرد، بەجۆرێک بەشێک لە کاندیدەکان بۆ ڕاكێشانی هەست و سۆزی دەنگدەر، وێنەی خۆیان لەسەر کەرەستەی ناوماڵ وەک "پووشی موبەریدە" یان "مریشکی بەستوو" لە شارەکانی تری عێراق داوە. چاودێرانی هەڵبژاردن پێیانوایە ئەم جۆرە هەڵسوکەوتانە کاریگەری نەرێنی لەسەر متمانەی گشتی بە پڕۆسەی هەڵبژاردن دەبێت.