كاره‌بای 24 كاتژمێری هۆكاره‌ بۆ پاكبوونه‌وه‌ى ژینگه‌ى كوردستان

ئاڤا نیوز

 

وتەبێژی چاککردنی ژینگەی کوردستان لەبارەی کاریگەری کوژاندنەوەی مۆلیدە ئەهلییەکان لەسەر ژینگەی کوردستان دەڵێت، "پشکنینی هەوای چوار گەڕەکمان کردووە، پێش کوژاندنەوەی مۆلیدەکان و دوای کوژاندنەوەیان. دەرکەوتووە کە بڕێکی زۆر تەنۆلکەی زیانبەخش لە هەوای ئەو گەڕەکانەدا نەماوە."

 

چیرۆکی سەرەکی: لەگەڵ درێژەدان بە پڕۆسەی کوژاندنەوەی مۆلیدە ئەهلییەکان لە هەرێمی کوردستان بەهۆی دەستپێکردنی پرۆژەی ڕووناکی بۆ دابینکردنی کارەبای 24 کاتژمێری، چاوەڕوان دەکرێت لە داهاتوویەکی نزیکدا کاریگەرییە ئەرێنییەکانی ئەم هەنگاوە بە ڕوونی لەسەر ژینگە و تەندروستیی گشتی هەستی پێبکرێت. بەپێی زانیارییەکان، تا ئێستا نزیکەی سێ هەزار و 222 مۆلیدە کوژێنراونەتەوە، کە بە شێوەیەکی بەرچاو کاریگەری لەسەر پاکبوونەوەی هەوای شارەکان هەبووە.

 

کاریگەرییە ئەرێنییەکان: ئەم پڕۆسەیە وردە وردە ئەنجامەکانی دەردەکەوێت. بە تایبەت لە هەولێر، چیتر بەیانیان ئاسمانی شارەکە بە پەڵەی ڕەش و دووکەڵی چڕ داپۆشراو نابینرێت، ئەمەش ئاماژەیەکی ئەرێنییە بۆ باشبوونی کوالێتی هەوا. ئەم دۆخە بۆ شارەکانی تریش دروستە و چاوەڕوان دەکرێت هەوای هەرێمی کوردستان بەهۆی کوژاندنەوەی مۆلیدە ئەهلییەکان پاک بێتەوە.

 

لێدوانی فەرمی: دکتۆر سەنعان، وتەبێژی چاککردنی ژینگەی کوردستان، بە ئاڤای گوت، بە بەڵگە و لێکۆڵینەوەی زانستی کاریگەری کوژاندنەوەی مۆلیدەکان سەلمێنراوە. ناوبراو ڕایگەیاند: "پشکنینی هەوای چوار گەڕەکمان کردووە، پێش کوژاندنەوەی مۆلیدەکان و دوای کوژاندنەوەیان. دەرکەوتووە کە بڕێکی زۆر تەنۆلکەی زیانبەخش لە هەوای ئەو گەڕەکانەدا نەماوە."

ئەو دەڵێت، ئەم تەنۆلکە پیسانە، کە پێشتر هۆکاری سەرەکی بوون بۆ پڕبوونی نەخۆشخانەکان بە تووشبووانی شێرپەنجە، حەساسیەت و ڕەبۆ، ئێستا بە شێوەیەکی بەرچاو کەم دەبنەوە، ئەمەش کاریگەری ئەرێنی لەسەر تەندروستیی هاووڵاتییان دەبێت.

 

ئەوەی پێویستە بیزانیت: دکتۆر سەنعان نموونەیەک دەهێنێتەوە: کە تەنها لە چوار گەڕەکی هەولێر (باداوا، گوڵان، هەڤاڵان، برایەتی) کە پێشتر ساڵانە شەش ملیۆن لیتر گازیان بەکاردەهێنا، ئێستا ئەو بڕە زۆرە لە بەکارهێنان نەماوە. هەروەها، بۆ ساردکردنەوەی مۆلیدەکانی ئەو چوار گەڕەکە، هەزاران مەتر سێجا ئاو بەکاردەهات و 166 هەزار تۆن گازی دوانۆکسیدی کاربۆنیش دەردرا، کە ئێستا ئەوانیش نەماون.

 

ئەمەش بزانە: ئەم ئامارانە تەنها هی چوار گەڕەکن، و پێشبینی دەکرێت لەگەڵ کوژاندنەوەی سەرجەم مۆلیدە ئەهلییەکان لە شارەکانی کوردستان، بڕێکی زۆر زیاتر لە ژەهر و پیسی لە هەوا نەمێنن. ئەمەش دەبێتە هۆی پاکبوونەوەیەکی بەرچاوی ژینگە.