لە هەولێر پێنج پارکی گەورە دروست دەکرێن

ئاڤا نیوز

پێنج پارکی گەورە بە ڕووبەری جیاواز لە شاری هەولێر دروست دەکرێن و زیاتر لە 40 هەزای داری جیاواز و ناوزەیان تێدا دەچێندرێت.

وێنە گەورەکە: لە چوارچێوەی هەوڵەکانی حکومەتی هەرێمی کوردستان بۆ ڕووبەڕووبوونەوەی گۆڕانەکانی کەشوهەوا، ڕێژەی سەوزایی لە شارەکان زیاد دەکرێت و گرنگی زیاتر بە دروستکردنی پارک و باخچە، چاندنی دار و دروستکردنی دارستان و دوورگە ناوەندییەکان دەدرێت، ئەمەش کاریگەریی ئەرێنی لەسەر ژینگەی ناوچەکان دروست دەکات.

لێدوانی فەرمی: سەروەر وەیسی کەریم، بەرپرسی هۆبەی بەشی ڕاگەیاندنی ئەندازەی پارکەکان بە ئاڤای ڕاگەیاند: پێنج پارکی گەورە لە هەولێر دروست دەکرێن و بەشێکیان لە قۆناغی تەواوبووندان، هەر پێنج پڕۆژەکە پێنج سەد هەزار مەتر دووجایە کە دەکاتە 200 دۆنم زەوی، هەروەها زیاتر لە 40 هەزار داری جۆراوجۆریان تێدا دەچێنرێت.

ئەوەی پێویستە بیزانیت: لە ئێستادا کار لەسەر دروستکردنی پێنج پارک دەکرێت:  

یەکەم: پارکی سەوزایی یەکتربڕی 150 مەتری کە ڕووبەری 150 هەزار مەتر دووجایە و دەکاتە 60 دۆنم، نزیکەی پێنج هەزار داری جۆراوجۆر چێندراون.

دووەم: پارکی سەوزایی یەکتربڕی 120 مەتری کە ڕووبەری 205 هەزار مەتر دووجایە و دەکاتە 80 دۆنم زەوی، نزیکەی هەشت هەزار داری لێ دەچێندرێت.

سێیەم: پارکی ڕەشکین ڕووبەری 116 هەزار مەتر دووجایە و دەکاتە 47 دۆنم زەوی، 16 هەزار داری جۆراوجۆریان تێدا دەچێندرێت.

چوارەم: پارکی گەڕەکی ناز ناز ڕووبەرەکەی 11 هەزار مەتر دووجایە کە دەکاتە چوار دۆنم و نیو زەوی، پێنج هەزار داری جۆراوجۆری تێدا دەچێندرێت.

پێنجەم: پارکی گەڕەکی ژیان ڕووبەری 17 هەزار مەتر دووجایە و دەکاتە 7 دۆنم زەوی، پێنج هەزار داری جۆراوجۆری تێدا دەچێندرێت.

ژمارەکان وادەڵێن: ئاڤا میدیا دوایین داتای پارک و باخچەکان لە سنووری شەش شارەوانییەکەی شاری هەولێر بڵاودەکاتەوە:

شارەوانی یەک: نۆ پارکی گەورە، 28 پارکی بچووک، دوو ناوچەی دار و سیاج، 12 دارستان، 23 دوورگەی ناوەندی.

شارەوانی دوو: دوو پارکی گەورە، 46 پارکی بچووک، چوار ناوچەی دار و سیاج، پێنج پشتێنەی سەوزایی، 26 دارستان، 33 دوورگەی ناوەندی.

شارەوانی سێ: سێ پارکی گەورە، 35 پارکی بچووک، پێنج ناوچەی دار و سیاج، پێنج پشتێنەی سەوزایی، 20 دارستان، 20 دوورگەی ناوەندی.

شارەوانی چوار: سێ پارکی گەورە، 40 پارکی بچووک، 17 ناوچەی دار و سیاج، هەشت پشتێنەی سەوزایی، 69 دارستان، 42 دوورگەی ناوەندی.

شارەوانی پێنج: چوار پارکی گەورە، 31 پارکی بچووک، چوار ناوچەی دار و سیاج، یەک پشتێنەی سەوزایی، 51 دارستان، 20 دوورگەی ناوەندی.

شارەوانی شەش: دوو پارکی گەورە، 14 پارکی بچووک، یەک ناوچەی دار و سیاج، سێ پشتێنەی سەوزایی، 31 دارستان، 25 دوورگەی ناوەندی.

ئەوەی پێویستە بیزانیت: بەپێی داتاکان شاری هەولێر خاوەنی 23 پارکی گەورە و 194 پارکی بچووکە، هاوکات خاوەنی 33 ناوچەی بە دار چێنراو و 22 پشتێنەی سەوزایی، 209 دارستان، 163 دوورگەی ناوەندیی.