پسوولەی خۆراکی هەولێر لەڕێگەی ئاڤاوە هاونیشتمانیان ئاگادار دەکاتەوە

ئاڤا نیوز

لە کاتێکدا کە ئەپڵیکەیشنی پسوولەی خۆراک لە سەرتاسەری عێراق وەستاوە، دەیان هاونیشتمانی ڕۆژانە سەردانی بەڕێوەبەرایەتیی ڕێکخستنی پسوولەی هەولێر دەکەن و بەڕێوەبەرایەتییەکە لەڕێگەی ئاڤاوە هاونیشتمانیان ئاگادار دەکاتەوە.

وێنە گەورەکە: لە ئایندەیەکی نزیکدا پسوولەی خۆراک لە سەرتاسەری هەرێمی کوردستان و عێراق بەئەلیکترۆنی دەکرێت، بەمەش چیتر مامەڵەی تۆمارکردنی خێزان لە فۆرمی خۆراک و مامەڵەکانی دیکەی پەیوەست بە بەشەخۆراک بە مامەڵەی کاغەزی ناکرێت و ڕۆتیناتی کەغەزی لای بەڕێوەبەرایەتییەکە و بریکارەکانی خۆراک و هاونیشتمانیانش نامێنێت.

لێدوانی فەرمی: سیامەند قادر نانەکەلی، بەڕێوەبەری بەڕێوەبەرایەتیی ڕێکخستنی پسوولەی خۆراکی هەولێر بە ئاڤای راگەیاند: لەکاتێکدا کە ئەپڵیکەیشنی ئەلیکتڕۆنی پسوولەی خۆراک لە تەواوی عێراق وەستا، ڕۆژانە خەڵکێکی زۆر سەردانمان دەکەن و دەیانەوێت مامەڵەکانی تایبەت بە پسوولەی خۆراک ئەنجام بدەن، بەڵام ئێستا سیستمەکە کار ناکات و داوا لە هاونیشتمانیان دەکەین تاوەکو ئەپڵیکەیشنەکە کارا دەبێتەوە، سەردانی بەڕێوەبەرایەتییەکەمان نەکەن.

زانیاریی زیاتر: بە گوتەی سیامەند قادر نانەکەلی، ئەپڵیکەیشنی پسوولەی خۆراک لە مووسڵ، کەربەلا و بەسرە کێشەی تەکنیکی هەیە، بۆیە لە سەرتاسەری عێراق وەستاوە و نازانین کەی کارا دەبێتەوە. 

ئەوەی پێویستە بیزانیت: بۆ ڕایکردنی مامەڵەکانی تایبەت بە پسوولەی خۆراک، پێویست ناکات هاونیشتمانیان سەردانی بەڕێوەبەرایەتییەکە بکەن، کاتێک ئەپڵیکەیشنەکە کارا کرایەوە تەواوی خزمەتگوزارییەکان لە ئەپڵیکەیشنەکە بەردەستن و هاونیشتمانیان دەتوانن خۆیان تۆمار بکەن، بەڵام دەبێت بڕی 10 هەزار دینار بۆ ڕاییکردنی مامەڵە و هەزار دینار بۆ هەڵمەتی کۆکردنەوەی پارە بۆ ناوچە هەژارنشینەکان بدەن.

باکگراوند: ڕۆژی پێنجشەممە 2025-5-08، وەک یەکەمین پارێزگای هەرێمی کوردستان ئەپڵیکەیشنی پسووڵەی خۆراک لە هەڵەبجە کارا کرا.