سکاڵا دژی بەشداریکردنی حیزبە چەکدارەکانی عێراق لە هەڵبژاردن تۆمار دەکرێت

ئاڤا نیوز

چالاکوانانی عێراق سکاڵای دژی حیزبە چەکدارەکانی عێراق تۆمار دەکەن، هاوکات داوایان ئەوەیە نابێت بەشداری هەڵبژاردنی پەرلەمان بکەن لە کاتێکدا خاوەنی گرووپ و چەکدارن کە دژی یاسا و دەستوورە.

چیرۆکی سەرەکی: چالاکوانانی ئۆپۆزسیۆن کە لەژێر ناوی "گردبوونەوەی سەربەخۆیی عێراق"دا کاردەکەن، سکاڵای فەرمییان لە کۆمسیۆنی باڵای سەربەخۆی هەڵبژاردنەکان لە دژی هەموو ئەو لایەنانەی پێکهاتەی چەکداریان هەیە، تۆمارکردووە. هاوکات نیازی خۆیان بۆ تۆمارکردنی سکاڵا لە دادگای باڵای فیدراڵی دژی پەرلەمان تۆمارکردووە بەهۆی یاسای هەڵبژاردنەوە.

ڕاگەیێنراوی فەرمی: لە ڕاگەیێنراوی ئەو چالاکوانانە هاتووە، سکاڵای فەرمیمان لە کۆمیسیۆنی باڵای سەربەخۆی هەڵبژاردنەکان و بەشی حیزب و ڕێکخراوە سیاسییەکان لە دژی هەموو ئەو لایەنانە تۆمارکردووە کە خاوەنی گرووپی چەکدارین، بەو پێیەی ئەمە پێشێلکارییەکی ڕوونی بڕگەکانی دەستوور و یاسای ئێستای پارتە سیاسییەکانە".

"لەم ڕوانگەیەوە هەنگاوی دووەممان تۆمارکردنی سکاڵایەکی یاسایی بوو لەبەردەم دادگای باڵای فیدراڵی دژی پەرلەمان، لەپێناو تانەدان لە یاسای ئێستای هەڵبژاردن کە چەند بڕگەیەکی نادەستووری تێدایە، بە لەبەرچاوگرتنی ناکۆکی ڕاستەوخۆیان لەگەڵ دەستوور و پێشێلکردنی بنەماکانی دادپەروەری و دەرفەتی یەکسان بۆ هاووڵاتیان."

زانیاریی زیاتر: سکاڵاکە دژی ئەم حیزبانە بە دەیان بەڵگەوە تۆمارکراوە:

٠ بزووتنەوەی سادیقوون باڵی سەربازیی عەسائیبی ئەهلی حەق بە سەرۆکایەتیی قەیس خەزعەلی.

٠ ڕێکخراوی بەدر کە باڵی چەکداریی هەیە و هادی عامری سەرۆکایەتیی دەکات.

٠ بزووتنەوەی بابیلۆن کە کریستیانە و ڕەیان کلدانی سەرۆکایەتیی دەکات.

٠ بزووتنەوەی مونتەسیروون.

٠ بزووتنەوەی عێراقی ئیسلامی.

٠ هاوپەیمانیی خەدەمات.

٠ حیزبی موحافیزون.

٠ بزووتنەوەی جیهاد و بینا.

٠ هاوپەیمانیی سەفوەی نیشتمانی.

٠ هاوپەیمانیی حەدبای نیشتمانی.

ئەوەی پێویستە بیزانیت: لە سەرەتای مانگی تەمموزی ئەمساڵدا، 100 کەسایەتیی میدیایی و ڕۆشنبیری عێراقی دەستپێشخەریی "عێراقیەکان"ـیان دەستپێکرد و هۆشدارییان دا لە لەدەستدانی شەرعیەتی هەڵبژاردنەکان بەهۆی "هەژموونی ئەو لایەنانەی کە باڵی چەکدار و دارایی ناڕوونیان هەیە".

ئەمەش بزانە: لە ساڵی 2015ـدا، پەرلەمانی عێراق "یاسای ڕێکخستنە حیزبی"ـیەکانی پەسەند کرد، بەپێی یاساکە، نابێت حیزبەکان گرێدراو و پاشکۆی وڵاتانی دەرەکی بن، قەدەغەکردنی ئەو حیزبانەی باڵی چەکداریان هەیە لە بەشداری پرۆسەی سیاسی.