سێ هەواڵی نوێ لەبارەی مووچە؛ سوودانی پرسەکە دەباتە ئەنجوومەنی وەزیران؟

ئاڤا نیوز

تیمێکی وەزارەتی دارایی و ئابووریی هەرێمی کوردستان بەرەو بەغدا بەڕێکەوتوون و لیستی مووچەی مانگی هەشتیان لەگەڵ خۆیان بردووە. بڕیارە سبەی سێشەممە لیستەکە بدەنە وەزارەتی دارایی عێراق. هاوکات هەر سبەی کۆبوونەوەی ئەنجوومەنی وەزیرانی عێراق دەکرێت، بەڵام پرسی مووچە و ئەنجامی گفتوگۆکانی هەولێر و بەغدا بەشێک نین لە ئەجێندای کۆبوونەوەکە.

چیرۆکی سەرەکی: ئەمڕۆ لە وەزارەتی دارایی هەرێم کۆبوونەوەیەکی گرنگ لەسەر پرسی مووچە بەڕێوەچوو، تێیدا شاندی باڵای دانوستانکاری هەرێمی کوردستان لەگەڵ سەرجەم وەزارەتە خاوەن داهاتەکان و بەڕێوەبەرە گشتی و ژمێریارەکانیان کۆبوونەوە. لەم کۆبوونەوەیەدا ڕاپۆرتێکی نوێ لەبارەی داهاتی نانەوتیی هەرێم بۆ بەغدا ئامادەکرا. تیمە تەکنیکییەکەی هەرێم کە ئەمشەو دەگەنە بەغدا، بڕیارە سبەی پێش کۆبوونەوەی ئەنجوومەنی وەزیرانی عێراق، لەگەڵ هاوتاکانیان کۆببنەوە و ڕاپۆرتی داهاتی نانەوتییان پێشکەش بکەن.

سبەی سێشەممە کۆبوونەوەی ئەنجوومەنی وەزیرانی عێراق دەکرێت، لەکاتێکدا محەممەد شیاع سوودانی، سەرۆکوەزیرانی عێراق، کە ئێستا لە برۆکسلە، بۆ کۆبوونەوەکە دەگەڕێتەوە. 

لێدوانی فەرمی: سەرچاوەیەکی باڵا لە حکومەتی عێراق بە ئاڤای ڕایگەیاندووە، پرسی مووچە و ئەنجامی گفتوگۆکانی هەولێر و بەغدا بەشێک نین لە ئەجێندای کۆبوونەوەکە. بەڵام، ئەگەر سوودانی خوێندنەوەی بۆ کۆنووسی هاوبەشی هەردوو شاندی دانوستانکار تەواو کردبێت و بەدڵی بووبێت، ئەوا سبەی کۆنووسەکە دەباتە کۆبوونەوەی ئەنجوومەنی وەزیران بۆ گفتوگۆ و دەنگدان لەسەری.

هەنگاوی داهاتوو: ئەگەر سوودانی خوێندنەوەی کۆنووسەکەی تەواو نەکردبێت یان تێبینی زەقی لەسەر هەبێت، لە ڕۆژانی داهاتوودا وەڵامی هەولێر دەداتەوە و داوا لە هەردوو شاند دەکات گفتوگۆی زیاتر بکەن بۆ نزیککردنەوەی بۆچوونەکان.

لەلایەکی دیکەوە: ڕێباز حەملان، یاریدەدەری سەرۆکوەزیرانی هەرێمی کوردستان، لەبارەی ناوەڕۆکی کۆنووسی ڕێککەوتنەکە ڕایگەیاندووە: "داهاتی ناوخۆ و ڕسوماتی ئەو داهاتانەی بە یاسا هی هەرێمی کوردستانن، هەر بۆ هەرێمی کوردستان دەبێت. ئەوەی بە داهاتی فیدراڵیش هەژمار دەکرێت، پەنجا بە پەنجا دەبێت. لەسەر گومرگ و داهاتی باجیش بە هەمان شێوە ڕێککەوتووین."

حەملان ئاماژەی بەوەشکردووە کە زۆر نزیکن لە ڕێککەوتن لەگەڵ عێراق و مووچەی مانگی حەوت و مانگەکانی دواتر بەپێی ڕێککەوتنە نوێیەکە دابەش دەکرێت.