عێراق هاوردەکردنی مریشکی بەستوو قەدەغە دەکات

ئاڤا نیوز

وەزارەتی کشتوکاڵی عێراق، بڕیاریدا بە قەدەغەکردنی هاوردەکردنی مریشکی بەستوو و پارچەکانی، بە ئامانجی پاراستنی بەرهەمی ناوخۆ و بەرهەمهێنەرانی پەلەوەر.

بۆچی گرنگە: ئەم بڕیارە کاریگەریی لەسەر پاراستنی بەرهەمی خۆماڵی دەبێت و دەبێتە هاندانێکیش بۆ کێڵگە پەلەوەرییەکان و ئەوانەی لەم کەرتە کاردەکەن.

ڕاگەیێنراوی فەرمی: بەگوێرەی ڕاگەیێنراوی وەزارەتەکە، بڕیارەکە "لەگەڵ سیاسەتی وەزارەتدا یەکدەگرێتەوە لە پاراستنی بەرهەمی ناوخۆ و بەرهەمهێنەرانی پەلەوەر و بەپێی ئەوەی کە عەباس جەبر مالکی، وەزیری کشتوکاڵ خستوویەتییە ڕوو"، ڕوونیشی کردەوە کە "ئەنجوومەنی وەزیرانی ئابووری دەنگی داوە بە قەدەغەکردنی هاتنە ناوەوەی مریشکی بەستووی تەواو و پارچە کراو و بەرهەمەکانی دیکەی مریشک، ئەمەش پاراستنی بەرهەمی ناوخۆیی مسۆگەر دەکات."

ئەوەی پێویستە بیزانیت: بەگوێرەی ڕاگەیێنراوەکە، "بڕیارەکە دوای 45 ڕۆژ لە دەرچوونی جێبەجێ دەکرێت، ئەمەش دەرفەت دەدات بە لایەنە پەیوەندیدارەکان بۆ گرتنەبەری ڕێوشوێنی پێویست".

ئەمەش بزانە: ژمارەی کێڵگە پەلەوەرییەکان لە عێراقدا نزیکەی 1200 کێڵگەیە لە سەرانسەری وڵاتدا جگە لە هەرێمی کوردستان، لە کاتێکدا ژمارەی دامەزراوەکانی مریشکی هێلکەکەر نزیکەی 500 کێڵگەیە و مریشکی گۆشت نزیکەی 700 کێڵگەیە، بەپێی لێدوانە فەرمییەکان.