زیاتر لە 31 هەزار پێشمەرگەی هەردوو یەکەی حەفتا و هەشتا زەوییان پێدەدرێت

ئاڤا نیوز

لە چوارچێوەی پێدانی زەوی بە فەرمانبەران ئەنجوومەنی وەزیران ڕەزامەندی داوە لەسەر پێدانی زەوی بە زیاتر لە 31 هەزار پێشمەرگەی یەکەی حەفتا و یەکەی هەشتا.

وێنە گەورەکە: هەنگاوەکانی پێدانی زەوی بەسەر فەرمانبەران بەردەوامن، هەموو ئەو فەرمانبەر و خانەنشین و پێشمەرگانەی مەرج و ڕێنماییەکان دەیانگرێتەوە زەوییان پێدەدرێت.

لێدوانی فەرمی: سەربەست مەولوود، سەرپەرشتیاری تیمی وردبینیی پڕۆسەی دابەشکردنی زەوی له‌ وه‌زاره‌تی شاره‌وانی بە ئاڤا میدیای گوت: زیاتر لە 31 هەزار پێشمەرگەی یەکەی حەفتا و یەکەی هەشتا ڕەزامەندی پێدانی زەوییان وەرگرتووە، بەمجۆرە:

یەکەی حەفتا 11 هەزار 448 پێشمەرگە
یەکەی هەشتا 20 هەزار 244 پێشمەرگە

زانیاریی زیاتر: بە گوتەی سەربەست مەولوود نزیکەی شەش هەزار فۆرمی یەکەی حەفتا ماون ڕەزامەندیان پێبدرێت.

بۆچی گرنگە: پێدانی زەوی بە فەرمانبەران و پێشمەرگە و خانەنشینان کاریگەری گەورەی دەبێت لەسەر هەوڵەکانی چارەسەرکردنی کێشەی نیشتەجێبوون و کەمکردنەوەی ژمارەی کرێنشینان.