لە ئەنجوومەنی وەزیران لیژنەی قەرەبووکردنەوە بۆ خەڵکی گوندێکی شێخان پێکدەهێنرێت

ئاڤا نیوز

ماوەی زیاتر لە دە ساڵە دانیشتوانی گوندی ڕویلکێی سەر بە قەزای شێخان لە پارێزگای دهۆک، کرێی زەوییەکانیان لە کۆمپانیایەکی بەریتانی وەرنەگرتووە، کە کاری نەوت لە ناوچەکەدا دەکات. پاش بەدواداچوونێکی زۆر و ناردنی چەندین نووسراو بۆ لایەنە پەیوەندیدارەکان، لە ئێستادا لیژنەیەکی قەرەبووکردنەوە لە دیوانی ئەنجوومەنی وەزیران بۆ چارەسەرکردنی کێشەکە پێکهێنراوە.

چیرۆکی سەرەکی: گوندی ڕویلکێ، کە نزیکەی 100 ماڵ دەبێت، دەکەوێتە ناوچەیەکی دەوڵەمەند بە نەوت و کۆمپانیای گۆڵف کیستۆن پترۆلیۆمی بەریتانی زەوییەکانی گوندەکە بە کرێ بەکاردەهێنێت. بەڵام دانیشتووانی گوندەکە دەڵێن، ماوەی زیاتر لە دە ساڵە هیچ بڕە پارەیەکیان وەرنەگرتووە، کە بە گشتی دەگاتە سەدان ملیۆن دینار.

چی ڕوویدا: زیاتر لە 10 مانگ لەمەوبەر، نووسراوی داواکاری قەرەبووکردنەوەیان بەرزکرایەوە بۆ لایەنە پەیوەندیدارەکان. جێگری پارێزگاری دهۆک واژۆی لەسەر نووسراوێک کردووە و ئاراستەی وەزارەتی سامانە سرووشتییەکانی کردووە، تێیدا ئاماژەی بەوە کردووە کە داواکارییەکەی دانیشتووانی گوندەکە ڕەوایە و پێویستە قەرەبوو بکرێنەوە.

لە وەزارەتی سامانە سرووشتییەکانیش، بەڕێوەبەری گشتی گرێبەستەکان واژۆی لەسەر نووسراوەکە کردووە، واتا بڕیاری قەرەبووکردنەوەکە دەرچووە، بەڵام تا ئێستا جێبەجێ نەکراوە. ئەمەش وای کردووە کە لە مانگی ڕابردوودا، دانیشتووانی گوندەکە داواکارییەکی دیکە ئاراستەی وەزارەتی سامانە سرووشتییەکان بکەن بۆ جێبەجێکردنی بڕیارەکە و دابینکردنی قەرەبووەکانیان.

زانیاریی بەدەستهاتوو: بەگوێرەی بەدواداچوونەکانی ئاڤا، لیژنەیەکی قەرەبووکردنەوە لە دیوانی ئەنجوومەنی وەزیران لەسەر ئەم کێشەیە پێکهێنراوە. بەڵام، جێبەجێکردنی بڕیارەکە پێویستی بە کات دەبێت تا لیژنەکە کارەکانی تەواو دەکات و ڕێکارەکانی قەرەبووکردنەوە دەستپێدەکەن، پاشان دانیشتووانی گوندەکە دەتوانن کرێی زەوییەکانیان وەربگرن.