قوتابییەکی پۆلی 12 لە کەلار دوو ساڵە بەهۆی ڕووداوی نەخوازراو لە تاقیکردنەوە بێبەش دەبێت

ئاڤا نیوز

لە کەلار قوتابییەکی پۆلی دوانزە، دوای ساڵێک لە ماندووبوون و بەدەستهێنانی نەوەد لەسەد، لە تاقیکردنەوەکانی خولی دووەمدا تووشی ڕووداوێکی نەخوازراو بوو.

چی ڕوویدا: نیان، قوتابی پۆلی دوانزە کە ئەمڕۆ تاقیکردنەوەی فیزیای هەبوو، چەند ساتێک پێش چوونە ژوورەوە بۆ هۆڵی تاقیکردنەوە، لەسەر پەیژەکانی قوتابخانە قاچی خلیسکا و بەهۆیەوە بێهۆش بوو. یەکسەر مامۆستایان و ئیدارەی قوتابخانە پەیوەندییان بە بەڕێوەبەری پەروەردەی کەلار، کرد.

مامۆستا عەدالەت، بەڕێوەبەری پەروەردەی کەلار بە پەلە پەیوەندی بە نەخۆشخانەوە کرد بۆ ناردنی ئەمبوڵانس، بەڵام پێش گەیشتنی تیمەکانی فریاگوزاری، خۆی بە ئۆتۆمبێلەکەی نیانی گەیاندە نەخۆشخانەی فریاکەوتنی کەلار. دوای کاتژمێر و نیوێک، نیان هۆشی هاتەوە و یەکەم قسەی لەسەر تاقیکردنەوەکەی بوو، بە خەمگینییەوە وتی "ئەگەر نەیکەم دەرەجەم دادەبەزێت."

مامۆستاکانی هەوڵیاندا شوێنێکی ئارام بۆ نیان دابین بکەن بۆ ئەوەی تاقیکردنەوەکەی بکات، بەڵام پزیشکەکان ڕێگەیان نەدا بەهۆی ناجێگیریی دۆخی تەندروستییەوە. نوێنەری وەزارەتی پەروەردەش لەوێ ئامادە بوو و دۆخەکەی بە بەڕێوەبەرایەتی گشتی پەروەردەی گەرمیان و وەزارەتی پەروەردە ڕاگەیاند، داوای کرد چارەسەرێک بۆ ئەم کچە بدۆزرێتەوە تا ساڵەکەی نەفەوتێت.

لەلایەکی دیکەوە: ئالان حەمە سەعید، وەزیری پەروەردە، ڕایگەیاندووە، ئاگاداری ڕووداوەکە نەبووە و لە کۆبوونەوەدا بووە، هەروەها دووپاتیکردەوە کە خولی سێیەمی تاقیکردنەوەی وزارییان نییە.

ئەوەی پێویستە بیزانیت: ئەمە یەکەمجار نییە کە نیان تووشی ڕووداوێکی لەم جۆرە دەبێتەوە. ساڵی پار، هەر لە کاتی تاقیکردنەوەکانی خولی دووەمدا، ماڵەکەیان ئاگری تێبەربوو و سووتاوە، بەو هۆیەوە تاقیکردنەوەکانی فەوتا.