کارگەیەکی بەرهەمهێنانی گازی ئۆکسجین لە نەخۆشخانەیەکی هەولێر دەکرێتەوە

ئاڤا نیوز

کارگەیەکی بەرهەمهێنانی گازی ئۆکسجین لە نەخۆشخانەی ڕزگاریی هەولێر دەکرێتەوە و تەکنەلۆژیای پێشکەوتووی تێدا بەکارهێنراوە.

چیرۆکی سەرەکی: کارگەی بەرهەمهێنانی گازی ئۆکسجینی پزیشکی لە نەخۆشخانەی ڕزگاری نۆژەن کرایەوە و کارگەکە پێکهاتەیەکی گرنگ و کاریگەرە لە بەرزکردنەوەی خزمەتگوزاریی پزیشکی، بەتایبەتی بۆ ئەو نەخۆشانەی پێویستییان بە سەرچاوەی ئۆکسجین هەیە.

لێدوانی فەرمی: د. لاوەند میران، بەڕێوەبەری نەخۆشخانەی ڕزگاری بە ئاڤای ڕاگەیاند: ماوەی زیاتر لە شەش مانگ کارمان لەسەر نۆژەنکردنەوەی کارگەکە کردووە و تەواوی پێداویستییەکانی لە وڵاتی بەلجیکاوە هێنراوە، ئێستا کارگەکە کوالێتییەکی زۆر پێشکەوتووی هەیە و بە بەردەوامی ئۆکسجین بۆ نەخۆشان و چارەخوازان دابین دەکات.

زانیاریی زیاتر: بە گوتەی د. لاوەند میران، ڕۆژانە لە حەوت تاوەکو 100 نەشتەرگەری لە نەخۆشخانەی ڕزگاریی هەولێر دەکرێت، تەواوی نەشتەرگەرییەکانی پێویستیان بە ئۆکسجین هەیە، جگە لەمەش نەخۆشەکان لە چاوێری چڕی و بەشەکانی دیکەی نەخۆشخانەکە پێویستیان بە ئۆکسجین هەیە.

ئەوەی پیویستە بیزانیت: کارگەکە لەژێر چاودێری و بە سەرپەرشتیی نووسینگەی مەسرور بارزانی، سەرۆکوەزیرانی کوردستان نۆژەنکراوەتەوە و زیاتر لە 400 ملیۆن دیناری تێدا خەرجکراوە.

باکگراوند: ماوەی دوو ساڵە کارگەی بەرهەمهێنانی گازی ئۆکسجینی وەستا بوو، نەخۆشخانەکە بە ئۆکسجینی بوتڵ و تەنکییەکان کارەکانی ڕایی کردووە و ئۆکسجینی بۆ هاووڵاتیان دابین کردووە.