بزووتنەوەی جیهادی ئیسلامی هێرشەکەی ئیسرائیل بۆ سەر سەرکردەکانی حەماس لە دەوحە شەرمەزار دەکات

ئاڤا نیوز

بزووتنەوەی جیهادی ئیسلامی لە فەلەستین ئیدانەی هێرشەکەی ئیسرائیلی کرد بۆ سەر کۆبوونەوەی سەرکردەکانی بزووتنەوەی حەماس لە دەوحەی پایتەختی قەتەر و هێرشەکە بە "کردەوەیەکی تاوانکاری تەواو کە پێشێلی هەموو پێوەرە مرۆییەکان و یاسا و نەریتە نێودەوڵەتییەکان دەکات" ناو دەبات.

چیرۆکی سەرەکی: ئەمڕۆ سێشەممە ئیسرائیل لەڕێگەی فڕۆکەی جەنگییەوە ژمارەیەک بارەگای سەرکردەکانی حەماسی لە دەوحەی پایتەختی قەتەر کردە ئامانج، لە هێرشەکاندا کۆبوونەوەیەکی سەرکردایەتیی حەماسیش کراوەتە ئامانج.

ڕاگەیێنراوی فەرمی: بزووتنەوەکە لە ڕاگەیێنراوێکدا جەختی لەوە کردەوە هێرشەکە تەنانەت ڕەچاوی ئەوەشی نەکردووە کە دەوحە میوانداری شاندێکی دانوستاندنکار بووە. 

 

- بزووتنەوەی جیهادی ئیسلامی دەڵێت، ئەم "هێرشە تاوانکارییە جەخت لە پێداگریی قەوارەکە دەکاتەوە لەسەر بەردەوامیدان بە خوێنڕشتن لە جەنگی قڕکردنی کراوە دژی گەلی فەلەستین و پەرەسەندنێکی مەترسیدار پێکدەهێنێت کە نابێت لێی خۆش ببن."

 

- هاوکات بزووتنەوەکە ئیدارەی دۆناڵد ترەمپ، بە بەرپرسیار دەزانێت لە "سەرلێشێواوی ئیسرائیل و دەرچوونی لە هەموو کۆتوبەندێک".