چوارچێوەی هەماهەنگی: هێرشەکەی ئیسرائیل بۆ شکستپێهێنانی ئاگربەست بوو

ئاڤا نیوز

چوارچێوەی هەماهەنگی شیعەکان لە عێراق، هێرشەکەی دوێنێی ئیسرائیلی بۆ سەر بارەگایەکی حەماس لە دەوحەی پایتەختی قەتەر سەرکۆنە کرد و ڕایگەیاند، ئامانجی هێرشەکە بۆ شکستپێهێنانی ئاگربەست بووە لە فەڵەستین.

 

وێنە گەورەکە: ڕۆژی سێشەممە ئیسرائیل کۆبوونەوەیەکی سەرکردەکانی حەماسی لە دەوحە کردە ئامانج، هەرچەندە لە هێرشەکەدا هیچ سەرکردەیەکی حەماس نەکوژرا و سەرجەمیان ڕزگاریان بوو، بەڵام پێنج ئەندامی حەماس و ئەندامێکی هێزە ئەمنییەکانی قەتەر بەهۆی سەختی بۆردومانەکەوە گیانیان لەدەست دا.

 

ڕاگەیێنراوی فەرمی: فەرمانگەی ڕاگەیاندنی چوارچێوەی هەماهەنگی لە ڕاگەیێنراوێکدا ئاماژەی بەوەشداوە، هێرشەکەی ئیسرائیل بۆ سەر دەوحە پێشێلکردنی سەروەریی قەتەر و یاسا نێودەوڵەتییەکانە، هاوکات دەربڕی خواستی فراوانخوازیی ئیسرائیلیشە کە تەنیا سنووری فەڵەستین ناگرێتەوە بەڵکو ئارامی و ئاسایشی ناوچەکەی بە ئامانج گرتووە، هێرشەکەش بۆ شکستپێهێنانی هەر هەوڵێکی نێوەندگیرییە بۆ کۆتاییهێنان بە هێرشەکانی گەلی فەڵەستین.

 

دەشڵێت، لەپاڵ قەتەر دەوەستن و ئیسرائیل لەهەر کاردانەوەیەکی دژی هێرشەکە بەرپرسیار دەبێت، داواش لە ئەنجوومەنی ئاسایش دەکەن بە ئەرکی یاسایی خۆهەڵسێت و شەڕخوازیی ئیسرائیل و تاوانەکانی ڕابگرێت.