شەرع سەرۆکایەتی شاندی وڵاتەکەی بۆ لووتکەی ڕووسی عەرەبی لە مۆسکۆ دەکات

ئاڤا نیوز

باڵیۆزخانەی سووریا لە مۆسکۆ ڕایدەگەیێنێت، ئەحمەد شەرع، سەرۆککۆماری سووریا، سەرۆکایەتی شاندی وڵاتەکەی دەکات بۆ لووتکەی ڕووسی عەرەبی کە بڕیارە لە مۆسکۆ بەڕێوەبچێت.

چیرۆکی سەرەکی: بڕیارە یەکەمین لووتکەی ڕووسی و عەرەبی لە 15ـی تشرینی یەکەم لە مۆسکۆ بەڕێوەبچێت و چاوەڕوان دەکرێت نوێنەرانی وڵاتانی عەرەبی لە ڕۆژهەڵاتی ناوەڕاست و باکووری ئەفریقا، هەروەها وڵاتانی ڕۆژهەڵاتی ئەفریقا کە ئەندامن لە کۆمکاری وڵاتانی عەرەبی، بەشداری تێدا بکەن.

ڕاگەیێنراوی فەرمی: بەگوێرەی ڕاگەیێنراوی باڵیۆزخانەی سووریا لە مۆسکۆ "وەک دوێنێ لە کۆنگرەی ڕۆژنامەوانی جێگری سەرۆکوەزیرانی ڕووسیا، ئەلێکساندەر نۆڤاک و ئەسعەد شەیبانی، وەزیری دەرەوەی سووریا لە دیمەشق ڕاگەیێنرا، سووریا بەشداری لە لووتکەی داهاتووی ڕووسی و عەرەبی دەکات. شاندەکە لەلایەن سەرۆکی کۆماری عەرەبی سووریاوە سەرۆکایەتی دەکرێت".

ئەوەی پێویستە بیزانیت: پێشتر دیمیتری پێسکۆف، وتەبێژی کرێملن ڕایگەیاندبوو، ڕووسیا بانگهێشتی فەرمی دەسەڵاتدارانی نوێی سووریای کردووە بۆ بەشداریکردن لە لووتکەکەدا.