تورکیا داوا لە هاووڵاتییانی دەکات گەشت بۆ نیپاڵ نەکەن

ئاڤا نیوز

وەزارەتی دەرەوەی تورکیا داوا لە هاووڵاتییانی وڵاتەکەی دەکات "ئەگەر بۆ کارێکی زۆر پێویست نەبوو" سەردانی نیپاڵ نەکەن.

بۆچی گرنگە: ئەم بڕیارەی تورکیا بەهۆی تێکچوونی دۆخی ناوخۆیی وڵاتی نیپاڵە، تورکیا ڕێنمایی دەداتە هاووڵاتیانی کە بە هەستیارییەوە مامەڵە لەگەڵ دۆخەکە بکەن.

چیرۆکی سەرەکی: خۆپیشاندانی جەماوەری لە وڵاتی نیپال دروست بووە، سەرۆکوەزیرانی ئەو وڵاتە دەستی لە کارکێشایەوە، شەڕ و گرژیی لە ناوخۆی وڵات ڕوویداوە کە بەهۆیەوە 19 کەس گیانیان لەدەست دا و 400ـی دیکە برینداربوون.

ڕاگەیێنراوی فەرمی: وەزارەتی دەرەوەی تورکیا ڕایگەیاند: بەهۆی دوایین پێشهاتەکانی نیپاڵ، داوا لە هاووڵاتییانمان دەکەین، ئەگەر کاری زۆر پێویستییان نەبوو سەردانی ئەو وڵاتە نەکەن.

ئەو هاووڵاتییانەش کە لەوێ دەمێننەوە با ئاگاداری خۆیان بن و ئەگەر بۆیان بکرێت، پێشنیاز دەکەین شوێنی خۆیان بگۆڕن.

بەردەوام لە ماڵپەڕی فەرمی و ئەکاونتی سۆشیال میدیای باڵیۆزخانەی تورکیا لە نیودەلهی، چاودێری دوایین پێشهاتەکانی نیپاڵ بکەن.

لەلایەکی دیکەوە: تورکیا دوو ژمارە تەلەفۆنی لە باڵیۆزخانەی وڵاتەکەی لە نیپاڵ داناوە بۆ ئەوەی هاووڵاتییانی لە کاتی پێویست پەیوەندییان پێوە بکەن.