قەتەر نامەیەک لەبارەی هێرشەکەی ئیسرائیل دەگەیێنێتە ئەنجوومەنی ئاسایشی نێودەوڵەتی

ئاڤا نیوز

قەتەر نامەیەکی ئاراستەی ئەنتۆنیۆ گۆتێرێس، سکرتێری گشتیی نەتەوە یەکگرتووەکان و سونگجین کیم، سەرۆکی ئەنجومەنی ئاسایش بۆ مانگی ئەیلوول کرد، سەبارەت بە هێرشەکەی ئیسرائیل بۆ سەر دەوحە.

چیرۆکی سەرەکی: دوێنێ سێشەممە، ئیسرائیل هێرشی کردە سەر بارەگای شاندی دانوستانکاری بزووتنەوەی حەماس لە دەوحەی پایتەختی قەتەر و چەند کەسێک گیانیان لەدەستدا، ئەمەش کاردانەوەی تووندی قەتەر و وڵاتانی جیهانی بەدوای خۆیدا هێنا و قەتەر نامەیەکی ناڕەزایی ئاراستەی ئەنجوومەنی ئاسایشی نێودەوڵەتی کرد.

نامەکە لەلایەن عەلیا ئەحمەد بن سەیف ئال سانی، نوێنەری هەمیشەیی قەتەر لە نەتەوەیەکگرتووەکان نێردراوە، داوای کردووە بۆ ئەندامانی ئەنجوومەن بگوازرێتەوە و وەک بەڵگەنامەیەکی فەرمی لەژێر ژمارە S/2025/563 دەربکرێت. هاوکات دەوحە بە تووندترین شێوە ئەو هێرشە سەرکۆنە دەکات.

زانیاریی زیاتر: لە نامەکەدا ئاماژەی بەوەکراوە، دەوحە ڕەفتاری بێباکانەی ئیسرائیل قبوڵ ناکات، جەختیشی لەوە کردووەتەوە لێکۆڵینەوەکان لە ئاستە بەرزەکاندا بەردەوامن و وردەکاریی زیاتریش هەر لەگەڵ بەردەستبوونیان ڕادەگەیێنرێت.

لەلایەکی دیکەوە: پاکستان و جەزائیر داوای کۆبوونەوەیەکی خێرای ئەنجوومەنی ئاسایشی نێودەوڵەتییان کردووە، سەرچاوەیەکیش بۆ کەناڵی "ئەلجەزیرە"ـی قەتەری ڕایگەیاندووە، کۆبوونەوەکە ئەمڕۆ دەکرێت، بەڵام ئاژانسی "فرانس پرێس"ـی فەرەنسی ڕایگەیاند کە کۆبوونەوەکە ڕۆژی چوارشەممەی داهاتوو کاتژمێر 22:00 بە کاتی مەککە دەکرێت.