ئاڤای خەڵك؛ ئاڤا زانیاری نوێ لەبارەی داشکاندنی پارەی خوێندنی زانکۆ و پەیمانگەکان دەخاتەڕوو

ئاڤا نیوز

وەزارەتی خوێندنی باڵا و توێژینەوەی زانستی لەبارەی داشکاندنی پارەی پارالێڵ بۆ قوتابیانی بەکالۆریۆس و دیبلۆم و ماستەر و دکتۆرا ڕایگەیاند، داشکاندنەکە وەک ساڵانی ڕابردوو بەردەوام دەبێت.

چیرۆکی سەرەکی: بەشێک لە قوتابیانی ماستەر و دکتۆرا باس لەوە دەکەن، بەگوێرەی نووسراوێک کە وەزارەتی خوێندنی باڵا و توێژینەوەی زانستی ئاراستەی زانکۆکانی کردووە، پارەی سەرپەرشتیار و لیژنەی گفتوگۆ و لیژنەی زمانەوانی لە ئەستۆی وەزارەت دەبێت، بەڵام زانکۆکان ئەو پارەیەمان لێوەردەگرن، داوا دەکەین کار بەو نووسراوە بکرێت، هەروەها ئێستا زانکۆکان داوای قیستی ساڵی دووەمی خوێندن دەکەن و گوشارەکانیان بۆ ئەو مەبەستە دەستپێکردووە.

ئەوەی پێویستە بیزانیت: لە کابینەی نۆی حکومەتی هەرێمی کوردستان، 45% داشکاندن بۆ سەرجەم ئەو قوتابیانە کراوە کە بە پارالێڵ دەخوێنن، هەموو ساڵێک ئەم داشکاندنە نوێ دەکرێتەوە، بەڵام ئەو قوتابیانە داوای داشکاندنی زیاتر دەکەن.

لێدوانی فەرمی: د. توانا نەجەف بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستی بە ئاڤای وت: گشتاندنێکمان بۆ زانکۆکان کردووە، بەڵام نەمانوتووە قوتابیەکان پارە نەدەن، بەڵکو دەبێت پارە بە کاش بدەن و زانکۆکە پسوولەیەکی ( 27 ئەلف)ـیان پێ دەدەن، دواتر هەر بە پسوولە لە هەمان شوێن پارەکەیان لەسەر داهاتی زانکۆ بۆ خەرج دەکرێتەوە.

زانیاریی زیاتر: هەر قوتابییەکی ماستەر 925 هەزار دینار، بۆ قوتابی دکتۆراش ملیۆنێک و 150 هەزار دینار وەردەگیرێت، بەڵام دواتر لەسەر داهاتی زانکۆ بۆیان خەرج دەکرێتەوە، بەڵام بەپێی بەدواداچوونی ئاڤا، قوتابی هەیە زیاتر لە دوو ساڵە گفتوگۆی کردووە هێشتا پارەکەی بۆ خەرج نەکراوەتەوە.