دوای هێرشەکەی قەتەر عێراق بڕیاریدا سیستمی بەرگریی ئاسمانی بەهێز بکات

ئاڤا نیوز

دوای هێرشەکەی سەر قەتەر لەلایەن ئیسرائیلەوە، ئەنجوومەنی وەزاری ئاسایشی نیشتمانیی عێراق پڕۆژەیەکی گشتگیر بۆ پەرەپێدان و بوونیادنانی تواناکانی سیستمی بەرگری ئاسمانی عێراق پێشکەش دەکات.

چیرۆکی سەرەکی: ئەمڕۆ چوارشەممە، 10ـی ئەیلوولی 2025، محەممەد شیاع سوودانی، سەرۆکوەزیران و فەرماندەی گشتی هێزە چەکدارەکان، سەرۆکایەتی کۆبوونەوەی خولیی ئەنجوومەنی وەزاری ئاسایشی نیشتمانی کرد.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق لەسەر زاری سەباح نوعمان، وتەبێژی فەرماندی گشتی هێزە چەکدارەکان ڕایگەیاند، لە کۆبوونەوەکەدا، تاوتوێی دۆخی گشتیی ئەمنیی وڵات کرا و بڕیار و ڕاسپاردەی پێویست لەبارەی ئەو بابەتانەوە دران کە لە کۆبوونەوەکە خرانەڕوو.

بابەتە ستراتیژییەكان: بەگوێرەی ڕاگەیێنراوەکە، خاڵێکی سەرەکی کۆبوونەوەکە، پێشکەشکردنی پڕۆژەیەکی گشتگیر بوو بۆ پەرەپێدان و بوونیادنانی تواناکانی سیستمی بەرگری ئاسمانی عێراق، کە وردەکاری و پێداویستییە جیاوازەکانی تێدابوو.

ئەوەی پێویستە بیزانیت: دوێنێ سێشەممە، ئیسرائیل هێرشی کردە سەر بارەگای شاندی دانوستانکاری بزووتنەوەی حەماس لە دەوحەی پایتەختی قەتەر، سەرەڕای ڕزگاربوونی سەرکردەکانی حەماس، بەڵام کوڕی خەلیل حەییە، سەرۆکی مەکتەبی سیاسیی بزووتنەوەی حەماس و چەند کەسێکی دیکە کوژران.