دوو ملیار دیناری دیکە بۆ چارەسەرکردنی گرفتەکانی ئاو لە هەولێر دابین دەکرێت

ئاڤا نیوز

لەسەر ڕەزامەندی سەرۆکوەزیران مەسرور بارزانی دوو ملیار دیناری دیکە وەک فریاگوزاریى بۆ چارەسەرکردنى گرفتەکانى ئاو تەرخانکرا.

چیرۆکی سەرەکی: لە دیوانی پارێزگای هەولێر گفتوگۆ لەسەر چارەسەرکردنى گرفتى ئاوى شارە نیشتەجێکانى وەبەرهێنان، گرفتى کارەباى ئیفراز، دابینکردنى بودجەى پێویست بۆ چارەسەرکردنى کێشە و گرفتە تەکنیکیەکانى ئاوى ناو شار و دەوروبەری کرا، گوژمەیەک پارە بۆ چارەسەرکردنی کێشەکان دابین کرا.

لێدوانی فەرمی: ئومێد خۆشناو، پارێزگاری هەولێر ڕایگەیاند، هەردوو بەڕێوەبەرایەتیی وەبەرهێنان و بەڕێوەبەرایەتیی ئاوى هەولێرمان ڕاسپاردووە، پشتبەست بە ڕێنمایی و ڕێکارەکانى تایبەت بە گەیاندنى ئاو بە هاوڵاتییان، دیراسەیەکى ووردى کێشەکانى ئاوى شارە نیشتجێبووەکانى وەبەرهێنان بکرێت.

زانیاریی زیاتر: پارێزگاری هەولێر، دەڵێت، لیژنەیەک پێکهێنراوە بۆ گرفتە تەکنیکییەکانى کارەباى ئیفراز یەک و دوو و سێ،  کە کێشەى دابەزین و نزمبوونى ڤۆڵتیەیان هەیە.

بۆ ئەم مانگە لە سەر ڕەزامەندى سەرۆکوەزیران مەسرور بارزانی، بڕی دوو  ملیار دیناری دیکە وەک فریاگوزاریى بۆ چارەسەرکردن و نۆژەنکردنەوە و چاککردنەوەى کەم و کوڕییە تەکنیکیەکان و نەهێشتنی گرفت و کێشەکانى سەرچاوەکانى ئاو تەرخانکراوە، جەخت لەوە کراوەتەوە‌ کە دەبێت لە زووترین کاتدا ڕێکارى پێویست بگرنەبەر بۆ چارەسەرکردنى کێشەکانی ئاو.