بۆ گەیشتن بە خۆبژێووی لە وزە، عێراق پشت بە کۆمپانیا ئەمریکییەکان دەبەستێت

ئاڤا نیوز

بریکاری وەزارەتی نەوتی عێراق لەگەڵ کۆمپانیای "KBR"ـی ئەمریکی کۆبووەوە و ڕایگەیاند، بۆ گەیشتن بە خۆبژێووی لەبواری وزە و بەتایبەتیش سووتەمەنی لە بەرهەمەکانی نەوت، پشت هەوڵی ناوخۆ و ئەزموونی کۆمپانیا بیانییەکان دەبەستن لەناویشیاندا کۆمپانیا ئەمریکییەکان.

وێنە گەورەکە: لە چوارچێوەی ڕوانگەی عێراق بۆ ساڵی 2030 حکومەت پلانی داناوە سوتانی غاز بە تەواوی کۆنتڕۆڵ بکات و وەبەرهێنانی تێدا بکات، جگە لەوەش لە زۆرێک لە پارێزگاکان پاڵاوگەی بوونیادناوە و خواستی گەیشتن بە خۆبژێویی لە سووتەمەنی هەیە، بەوەش پارە ناچێتە دەرەوە و لەناوخۆدا بەنرخێکی هەرزانتر سووتەمەنی دابین دەکات.

ڕاگەیێنراوی فەرمی: وەزارەتی نەوتی عێراق بڵاویکردەوە، عەدنان حەموود، بریکاری وەزارەتی نەوت بۆ کارووباری پاڵاوتن لەگەڵ شاندێکی کۆمپانیای "KBR"ـی ئەمریکی کۆبووەوە، لە کۆبوونەوەکەشدا باس لە گەشەپێدانی کەرتی پاڵاوتن کراوە، ئەویش پاڵپشت بە هەوڵی نیشتیمانیی لە ناوخۆ و ئەزموونی بیانی، لەم ڕووەشەوە عێراق پێداگرە لەسەر کارکردن لەگەڵ کۆمپانیا جیهانییە ڕەسەنەکان و سوود وەرگرتن لە ئەزموونیان لەبوارەکانی بەڕێوەبردنی ئەندازیاری و تەکنەلۆژیای نوێ، لە دەرئەنجامی ئەم پێکەوەکارکردنەش ئابووری وڵات زیاتر گەشە دەکات.

ئەوەشی خستووەتەڕوو، لە کۆبوونەوەکەدا باس لەو پڕۆژانەش کراوە کە ئێستا لە قۆناغی جێبەجێکردن دان یان لە داهاتوودا جێبەجێ دەکرێن و دەبنەهۆی زیاتر گەشەسەندنی کەرتی وزە و سووتەمەنیی و گەیشتن بە خۆبژێوویی لەو بوارانەدا.