کۆمیسیۆنی باڵای هەڵبژاردنی سووریا: ڕەققە و حەسەکە دەخرێنەوە نێو پڕۆسەی هەڵبژاردن

ئاڤا نیوز

کۆمیسیۆنی باڵای هەڵبژاردنەکانی ئەنجوومەنی گەلی سووریا بڕیاریدا پارێزگاکانی ڕەققە و حەسەکە بگەڕێنێتەوە نێو پڕۆسەی هەڵبژاردن، ئەم بڕیارە نوێیە بە پێکهێنانی لیژنەی لاوەکی لە هەندێک ناوچەی ئەو دوو پارێزگایە جێبەجێ دەکرێت.

ئەوەی پێویستە بیزانیت: پێشتر وتەبێژی فەرمیی کۆمیسیۆنی باڵای هەڵبژاردنەکان لە سووریا ڕایگەیاندبوو، کۆمیسیۆن بڕیاری داوە بە دواخستنی ئەنجامدانی هەڵبژاردنی پەرلەمانی لە پارێزگاکانی ڕەققە و حەسەکە و سوەیدا بەهۆی بارودۆخی ئەمنییەوە. 

لە بەرامبەردا: بەرێوەبەرایەتیی خۆسەری دیموکراتی لە باکوور و ڕۆژهەڵاتی سووریا، هەڵبژاردنەکانی داهاتووی سووریا بە تووندی ڕەت کردەوە و ڕایگەیاندبوو، ئەو پرۆسەیە "نادیموکراسییە و بەهیچ شێوەیەک گوزارشت لە ئیرادەی گەلی سووریا ناکات". 

نووسراوی فەرمی: کۆمیسیۆنی باڵای هەڵبژاردنەکانی ئەنجوومەنی گەلی سووریا  بڕیاری ژمارە 30ی ساڵی 2025ی دەرکرد، کە تێیدا لیژنەی لاوەکی لە هەردوو شاری ڕەققە و گرێ سپی سەر بە پارێزگای ڕەققە و سەرێ کانی سەر بە پارێزگای حەسەکە پێکهێنرا.

باکگراوند: ئامادەکارییەکان بۆ هەڵبژاردنی داهاتووی پەرلەمانی سووریا دەستیانپێکردووە، چاوەڕوان دەکرێت یەکەم پرۆسەی هەڵبژاردنی ئەنجوومەنی گەل لەنێوان 15 و 20ی ئەیلوولی ئەمساڵ لە سووریا بکرێت.