ڕۆژنامەی تورکیا: ئەنقەرە یاریەکەی ئیسرائیلی لە قەتەر تێکدا

ئاڤا نیوز

فڕۆکەکانی ئیسرائیل، پلانێکی وردیان دانا بۆ ئەوەی سەرکردەکانی حەماس کە لەسەر داوای ئەمریکا بۆ دانووستان چووبوونە دەوحە بە ئامانج بگرێت و هەموویان بکوژێت، بەڵام هەواڵگری ئەنقەرە پلانی ئیسرائیلی تێکدا و نەیهێشت هیچ سەرکردەی حەماسی بکوژرێت.

چیرۆکی سەرەکی: ڕۆژی سێشەممە، ئیسرائیل هێرشی کردە سەر بارەگای شاندی دانووستانکاری بزووتنەوەی حەماس لە دەوحەی پایتەختی قەتەر، سەرەڕای ڕزگاربوونی سەرکردەکانی حەماس، بەڵام کوڕی خەلیل ئەلحەیە، سەرۆکی شاندەکە و چەند کەسێکی دیکە گیانیان لەدەستدا.


زانیاریی زیاتر: هەر لەو ڕۆژەی کە ئیسرائیل هێرشی بۆ سەر قەتەر ئەنجامدا، لە هەمان کاتدا بۆردوومانی بۆ سەر توونس و لوبنان و فەلەستینیش ئەنجامداوە. 


لەلایەکی دیکەوە: چەند بەرپرسێکی حەماس کە قسەیان بۆ میدیاکانی تورکیا کردووەتەوە، بەرلەوەی ئیسرائیل هێرشەکەی ئەنجامبدات هەر زوو دەزگای هەواڵگریی تورکیا هەستی بەو چالاکییە کردووە و سەرکردەکانی حەماس ئاگادارکردووەتەوە. 

ئەوەی پێویستە بیزانیت: میت بە چاودێریکردنی ڕێڕەوی فڕۆکە ئیسرائیلییەکان، زانیویەتی هێرشەکە بە ئاراستەی ئەو شاندە دەبێت و یەکسەر شاندەکەی ئاگادار کردووەتەوە و ڕێگری لە کۆمەڵکوژییەکە کرد. دواتر بەشێک لە شاندە دانوستانکارەکان براون بۆ تورکیا.