پشکی هەرێمی کوردستان بۆ فەریزەی حەج زیاد دەکرێت

ئاڤا نیوز

پرۆسەی ناونووسین بۆ حەج بەردەوامی هەیە، تاوەکو ئێستا نزیکەی 70 هەزار کەس ناوی خۆیان لەڕێگەی دیجیتاڵی تۆمارکردووە، بەشێکی دیکەی داواکارییەکان نەگەیشتوون دەبێت داواکاران پێداچوونەوەی پێدا بکەن، بڕیارە پشکی هەرێمی کوردستان لە حەج زیاد بکرێت.

وێنە گەورەکە: نۆ ڕۆژ وەک دوایین وادە بۆ تۆمارکردنی هاووڵاتییان، ئەوانەی دەیانەوێت حەج بکەن، حەجخوازان لەڕێگەی دیجیتاڵی بەکەمترین ماندووبوون دەتوانن ناو و زانیارییەکانی خۆیان تۆماربکەن، بەبێ هیچ تێچوویەک و بەکەمترین ماندووبوون.

لێدوانی فەرمی: کاروان ستوونی، وته‌بێژی حه‌ج و عومره‌ی كوردستان بە ئاڤای ڕاگه‌یاند، "تاوەکو ئەمڕۆ 68 هەزار و 400 کەس ناوی خۆیان تۆمارکردووە، بڕیارە لە سعودییە پشکی عێراق بەهۆی سەرژمێری نوێوە زیاد بکرێت، ئەگەر ئەو بڕیارە جێبەجێ بکرێت پشکی هەرێمی کوردستانیش زیاد دەبێت و ساڵی داهاتوو نزیکەی حەوت هەزار کەسی هەرێمی کوردستان فەریزەی حەج بەجێدەگەیێنن."

ئەمەش بزانە: ڕۆژانه‌ش داواكارییه‌كان زیاد ده‌بێت تاوه‌كوو كۆتا رۆژی ناونووسین، دوای چەند ڕۆژێک لە پشکنین بەسەرپەرشتی ئەنجوومەنی وەزیران و فەرمانگەی تەکنەلۆژیای زانیاریی تیروپشک بۆ ئەو کەسانە دەکرێت کە ناویان بۆ حەجی ساڵی داهاتوو دەردەچێت، هاوکات پێویستە هاووڵاتیان پشکنین بۆ ناوەکانیان بکەن لەڕێگەی مۆبایل یان هەژماری دیجیتاڵی بچنە ناو سیستەمەکە، چونکە تاوەکوو ئێستا حەوت هەزار و 789 داواکاری پڕکراوەتەوە و لەخانەی پاشەکەوتکردن ماون دەبێت پێشکەش بکرێن.

ئەوەی پێویستە بیزانیت: ئێستا پشکی هەرێمی کوردستان بۆ حەجی ساڵی داهاتوو پێنج هەزار و 135 کەسە، بەڵام دوای زیادبوونی پشکەکە بۆ نزیکەی حەوت هەزار کەس بەرز دەبێتەوە.