قەتەر هەفتەی داهاتوو میوانداری لووتکەیەکی نائاسایی عەرەبی - ئیسلامی دەکات

ئاڤا نیوز

لەسەر بانگهێشتکردنی سەرۆکوەزیرانی عێراق، قەتەر میوانداری لووتکەیەکی نائاسایی عەرەبی-ئیسلامی دەکات بۆ تاوتوێکردنی لێکەوتەکانی هێرشی ئیسرائیل بۆ سەر دەوحە.

چیرۆکی سەرەکی: سێشەممە 2025-9-9، ئیسرائیل لەڕێگەی فڕۆکەی جەنگییەوە ژمارەیەک بارەگای سەرکردەکانی حەماسی لە دەوحەی پایتەختی قەتەر کردە ئامانج، لە هێرشەکاندا کۆبوونەوەیەکی سەرکردایەتیی حەماسیش کرایە ئامانج و بەهۆیەوە ژمارەیەک لە ئەندامانی بزووتنەوەکە کوژران و برینداربوون.

بڵاوکراوەی فەرمی: ئاژانسی هەواڵی قەتەر ئەمڕۆ پێنجشەممە 2025-9-11، ڕایگەیاند، دەوحەی پایتەخت ڕۆژانی یەکشەممە و دووشەممەی هەفتەی داهاتوو، میوانداری لووتکەیەکی نائاسایی عەرەبی-ئیسلامی دەکات، بۆ تاوتوێکردنی لێکەوتەکانی هێرشی ئیسرائیل بۆ سەر قەتەر.

ئەوەی پێویستە بیزانیت: ئەم لووتکەیە دوای بانگهێشتی محەممەد شیاع سوودانی، سەرۆکوەزیرانی عێراق دێت، بۆ ئەنجامدانی کۆبوونەوەیەکی نائاسایی کە سەرکردە عەرەبی و ئیسلامییەکان لەخۆبگرێت، بە ئامانجی هەماهەنگیکردنی هەڵوێستە هاوبەشەکان و ڕووبەڕووبوونەوەی لێکەوتە هەرێمییەکانی هێرشەکە.

 

ئەمەش بزانە: دوای هێرشەکەی ئیسرائیل بۆ سەر دەوحە، سەرۆکوەزیرانی عێراق بەتەلەفۆن لەگەڵ میری قەتەر قسەی کرد و ڕایگەیاند، هێرشەکەی ئەمڕۆ ئیسرائیل پێشهاتێکی مەترسیدارە و دەبێت لە ئاستی نێودەوڵەتی هەڵوێست دژی وەربگیرێت، ئاشکراشی کرد کە عێراق داوای کۆبوونەوەی بەپەلەی لوتکەی عەرەبی و ئیسلامی دەکات.